ޚިޔާލު ތަފާތު ވިޔަސް މެންބަރުންގެ ވާހަކަތަކަށް ޖާގަދިނުމަށް ރައީސް ނަޝީދު އިލްތިމާސްކޮށްފި
ރައްޔިތުންގެ މަޖިލީހުގައި ބަހުސްކުރެވޭ ކަންކަމުގައި ޚިޔާލު ތަފާތުވި ނަމަވެސް، މެންބަރުންގެ ވާހަކަތަކަށް ހުރަސްނާޅައި ބަހުސް ނުހުއްޓުވުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މެންބަރުންނަށް އިލްތިމާސްކުރައްވައިފިއެވެ.
މިއަދުގެ މަޖިލިސް ޖަލްސާގައި ރައީސް ނަޝީދު ވިދާޅުވީ ބަހުސް ހުއްޓުވުން އެއީ އެންމެ ފައިދާ ހުރި ގޮތް ކަމަށް ބައެއް މެންބަރުން ދެކިވަޑައިގަންނަވާ ކަމަށެވެ. ނަމަވެސް އެކަމުގައި އޮތް އެންމެ ރަނގަޅު ގޮތަކީ ބަހުސްކޮށް ރައްޔިތުންނަށް ކަންކަން އޮޅުން ފިލުވައިދިނުން ކަމަށް ރައީސް ނަޝީދު ވިދާޅުވިއެވެ.
މީގެ އިތުރުން، މަޖިލީހަށް ހުށައަޅާ މައްސަލަތަކާ މެދު ޢަމަލުކުރަނީ ޤާނޫނު އަސާސީ ތަންދޭ އެންމެ ފުޅާ މިނުގައި ކަމަށާއި އެއީ ޑިމޮކްރަސީ ނެގެހެއްޓުމަށް ޓަކައި ކުރުން މުހިންމު ކަމެއްކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު މި ފަދައިން ވިދާޅުވީ ހިޔާ ފްލެޓްތަކުގެ ފިނިޝިން މަސައްކަތްތައް، ނިންމައިދޭން، ފައިސާ ނަގައި، އެ މަސައްކަތް ނިންމައި ނުދީ ފައިސާއަށް ހިޔާނާތްތެރިވާ މައްސަލައަށް، ރައްޔިތުންގެ މަޖިލީހުގެ ޖަލްސާގައި ބަހުސްކުރުމާ މެދު ވޯޓު ނެގުމުގެ ކުރިން ދެއްކެވި ވާހަކަފުޅުގައެވެ.
