ދިވެހިން ބަހެއް ނާހާ! މިއަދު 149 ދިވެއްސަކު ކޮވިޑަށް ފައްސިވި
ރާއްޖެއިން މިއަދު 215 މީހަކު ކޮވިޑް-19 އަށް ފައްސިވެފައިވާ ކަމަށާއި އޭގެ ތެރޭގައި 149 ދިވެހީން ހިމެނޭ ކަމަށް އެޗްޕީއޭ އިން ބުނެފިއެވެ.
އެޗްޕީއޭ އިން ބުނީ މި 215 މީހުންގެ ތެރެއިން 214 ކޭސް ފެނިފައިވަނީ މާލެއިން ކަމަށާއި އަނެއް ކޭސް ފެނިފައިވަނީ އަތޮޅުތެރެއިން ކަމަށެވެ.
މިއަދު ފައްސިވި މީހުންގެ ތެރޭގައި ހިމެނެނީ 149 ދިވެހިންނާއި، ބަންގްލަދޭޝްގެ 54 މީހަކާއި، އިންޑިއާގެ ހަތް މީހަކާއި ސްރިލަންކާ ދެ މީހަކާއި ނޭޕާލް ދެ މީހެއްގެ އިތުރުން އިންޑޮނޭޝިއާ މީހެއް ކަމަށެވެ.
މިއީ މިހާތަނަށް 24 ގަޑިއިރުގެ ތެރޭގައި އެންމެ ގިނަ އަދަދެއްގެ މީހުން ފައްސިވި ދުވަހެވެ. މިއަދު ފައްސިވި މީހުންނާއެކު ރާއްޖޭގެ އަދަދު ވަނީ 4164 އަށް އަރާފައެވެ. މީގެތެރެއިން ފަރުވާ ދެމުން އަންނަނީ 1489 މީހުންނަށެވެ.
ރާއްޖެއިން ކޮވިޑް ޖެހިގެން މިހާތަނަށް ނިޔާވެފައި ވަނީ 18 މީހެކެވެ. އޭގެ ތެރޭގައި ހިމެނެނީ 12 ދިވެހީންނާއި، ހަ ބިދޭސީންނެވެ.
