4 ޕާޓީއަކަށް ފައިސާ ދޫކޮށްފި, ޕީޕީއެމްއަށް ދިނީ 500،000ރުފިޔާ އުނިކޮށްފައި
ޝަރުތު ހަމަވާ ހަތަރު ސިޔާސީ ޕާޓީއަކަށް މި މަހުގެ ތެރޭގައި ދައުލަތުގެ ބަޖެޓުން ފައިސާ ދޫކޮށްފައިވާ ކަމަށް ފިނޭންސް މިނިސްޓްރީން ވިދާޅުވެއްޖެއެވެ.
އޮންލައިން ނޫހަކަށް މަޢުލޫމާތު ދެއްވަމުން ފިނޭންސް މިނިސްޓްރީގެ އޮފިޝަލަކު މިއަދު ވިދާޅުވީ ޝަރުތު ހަމަވާ ހަތަރު ސިޔާސީ ޕާޓީއަކަށް މި މަހުގެ ތެރޭގައި ފައިސާ ދޫކޮށްފައިވާ ކަމަށާއި ޕީޕީއެމް ފިޔަވައި ބާކީ ތިބި ތިން ޕާޓީއަށް ފައިސާ ދޫކޮށްފައި ވަނީ މި މަހުގެ 7ވަަނަ ދުވަހު ކަމަށެވެ. ޕީޕީއެމްއަށް ފައިސާ ދޫކޮށްފައި ވަނީ މިދިޔަ ހަފްތާގެ ތެރޭގަައެވެ.
މަޢުލޫމާތު ލިބިފައިވާ ގޮތުގައި ޕީޕީއެމްއަށް ދޫކޮށްފައި ވަނީ އެ ޕާޓީއަށް ލިބެން ޖެހޭ ލާރީގެ ތެރެއިން 500،000 އުނިކޮށްފައެެވެ. އެ ފައިސާ އުނިކުރުމަށް ފަހު ޕީޕީއެމްއަށް ދޫކޮށްފައި ވަނީ 8.9 މިލިއަން ރުފިޔާއެވެ.
އިލެކްޝަންސް ކޮމިޝަނުން ހާމަކޮށްފައިވާ ގޮތުގައި ޕީޕީއެމްއަށް 9.4 މިލިއަން ރުފިޔާ ލިބެންޖެހެއެވެ. މީގެ އިތުރުން އެމްޑީޕީއަށް 15.02 މިލިއަން ރުފިޔާ، ޖޭޕީއަށް 5.53 މިލިއަން ރުފިޔާ އަދި އަދާލަތު ޕާޓީއަށް ލިބެން ޖެހެނީ 2.9 މިލިއަން ރުފިޔާއެވެ.
