ޕްރައިމަރީގައި ވާދަކޮށްފި ނަމަ ހޮވޭނެކަމުގެ އުންމީދު އެބައޮތް: ރައީސް ނަޝީދު

އެމްޑީޕީގެ އާއްމު މެންބަރުން ބޭނުން ވެއްޖެ ހާލަތެއްގައި 2023ވަނަ އަހަރުގެ ރިޔާސީ އިންތިޚާބުގެ އެ ޕާޓީގެ ޕްރައިމަރީގައި ވާދަ ކުރައްވާނެ ކަމަށާއި އުންމީދަކީ ޕްރައިމަރީ ކާމިޔާބު ކުރެއްވުން ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by STELCO

އިންޑިއާއަށް ނަޝީދު ކުރައްވަމުން ގެންދަވާ ދަތުރުފުޅުގައި އެ ޤައުމުގެ ނޫހެއް ކަމަށްވާ "ވިއޮން"އަށް ދެއްވި އިންޓަރވިއުއެއްގައި ރައީސް ނަޝީދު ވަނީ އެމްޑީޕީގެ އެތެރޭގެ ކޯޅުމާ ގުޅޭ ގޮތުން ވާހަކަފުޅު ދައްކަވައިފައެވެ. މިގޮތުން ވިދާޅުވީ، ޕާޓީ ތެރޭގެ އިންތިޚާބުތަކާ ގުޅިގެން ޚިޔާލު ތަފާތުވުމަކީ ޑިމޮކްރަސީތަކުގައި އާއްމު ކަމެއް ކަމަށެވެ. މިގޮތުން ވިދާޅުވީ، އެމެރިކާގައި ވެސް ޕާޓީ ތެރޭގައި އެކަކު އަނެކަކަށް ހަޅޭ ލަވައިގެން، އެކަމުގެ ތެރެއިން މީހަކު ރައްޔިތުންގެ ކުރިމައްޗަށް ނެރޭކަން ފާހަގަ ކުރެއްވިއެވެ.

"ހަޅޭލަވައިގެން، ބަހުސް ކޮށްގެން މީހަކު ހޮވަނީ، ދެން އެ މީހަކު ރައްޔިތުންގެ ކުރި މައްޗަށް ނެރެނީ" ރައީސް ނަޝީދު ވިދާޅުވިއެވެ.

ރިޔާސީ ޕްރައިމަރީގައި ރައީސް ނަޝީދު ވާދަ ކުރައްވާނެކަން އިއުލާން ކުރައްވައިފައި ވަނީ، ރައީސް ނަޝީދުގެ ދެބޭން ދެދަރި ކޮއްކޮ، މަޖިލީހުގެ ނައިބު ރައީސް އީވާ އަބްދުﷲއެވެ.

ރައީސް ނަޝީދު ވިދާޅުވީ، ޕާޓީގެ ރިޔާސީ ކެނޑިޑޭޓް ކަނޑައަޅާނީ، ޕާޓީގެ މެންބަރުން ކަމަށާއި، މެންބަރުން ބޭނުން ނަމަ، ރައީސް ނަޝީދު ވެސް ޕްރައިމަރީގައި ވާދަ ކުރައްވާނެ ކަމަށެވެ. އަދި ޕާޓީއާއި ޤައުމަށް ޓަކައި ކުރައްވަން ޖެހުނު ކޮންމެ ކަމެއް ކުރައްވާނެ ކަމަށް ވިދާޅުވިއެވެ.

ބަރުލަމާނީ ނިޒާމެއް ރާއްޖެ ގެންނަވަން މަސައްކަތް ކުރައްވާތީ އެކަމާ ގުޅޭ ގޮތުން ސުވާލު ދެންނެވުމުން ރައީސް ނަޝީދު ވިދާޅުވީ، ރާއްޖެ ފަދަ ކުޑަ ޤައުމަކަށް ބަރުލަމާނީ ނިޒާމެއް މުހިންމު ކަމަށް އަބަދު ވެސް ވަކާލާތު ކުރައްވާނެ ކަމަށެވެ. މިހާރުގެ ނިޒާމުގެ ދޯދިޔާ ކަމާ ގުޅޭ ގޮތުން ރައީސް ނަޝީދު ވިދާޅުވީ، މަޖިލީހުން ވަޒީރަކާ މިހާރު ސުވާލެއް ކުރަން ބޭނުން ވިޔަސް 4 ދުވަހުގެ ނޯޓިހެއް ދޭން ޖެހޭ ކަމަށެވެ. އަދި މަޖިލީހާ ވެރިކަން ހިންގުމުގެ ނިޒާމާ މާ ބޮޑު ގުޅުމެއް ނޯންނަ ކަމަށް ވިދާޅުވިއެވެ.