ރައީސް ޔާމީނަށް އިންޒާރުދިން ފަރާތުގެ މައްސަލަ ބަލާކަމެއް ނުވަތަ ނޫންކަމެއް ވެސް ނާންގާ: ޕީޕިއެމް
އިދިކޮޅު ލީޑަރު ރައީސް ޔާމީން ސައިޒްކޮށްލާނެކަމަށް ބުނެ އިންޒާރުދިން ފަރާތުގެ މައްސަލަ ބަލާކަމެއް ނުވަތަ ނޫންކަމެއް ނާންގާކަމަށް ޕީޕީއެމްއިން ވިދާޅުވެއްޖެއެވެ.
ރައީސް ޔާމީން ސައިޒްކޮށްލާނެ ކަމަށް ބުނެ މީސްމީޑިއާގެ ވީޑިއޯއެއްގައި އިންޒާރުދިން ފަރާތެއްގެ މައްސަލަ ފުލުހުންނަށާއި ޑިފެންސަށާއި ހިއުމަން ރައިޓްސް ކޮމިޝަނަށް އިދިކޮޅުން ވަނީ ހުށަހަޅައިފައެވެ. މައްސަލަ ހުށަހަޅައިފައި ވަނިކޮށް، އިންޒާރުދިން ފަރާތުން ރާއްޖެއިން ފުރައިގެން އިންޑިއާއަށް ގޮސްފައިވާ ކަމަށް ބައެއް މީޑިއާތަކުން މިއަދު ރިޕޯޓް ކުރިއެވެ.
މިކަމާ ގުޅޭ ގޮތުން ޕީޕީއެމްގެ ތަރުޖަމާނު ހީނާ ވަލީދަށް ނޫސްވެރިޔަކު ސުވާލު ކުރުމުން ވިދާޅުވީ، އޭނާ ފުރައިފައިވާކަން އެނގިފައި ނުވާ ކަމަށާއި މައްސަލަ ބަލާކަމެއް ވެސް ނޭނގޭ ކަމަށެވެ.
"ރައީސް ޔާމީނަށް އިންޒާރު ދިން މައްސަލަ ބަލާ ކަމެއް ވެސް ނުބަލާ ކަމެއް ވެސް، އެކަމާ ގުޅޭ ގޮތުން މިހައިތަނަށް އެއްވެސް ޖަވާބެއް ފުލުުހުން ދީފައެއް ނުވޭ،" ހީނާ ވިދާޅުވިއެވެ.
ހީނާ އިތުރަށް ވިދާޅުވީ، ރައީސް ޔާމީނަށް އިންޒާރު ދިނީ އިންޑިއާގެ ހައި ކޮމިޝަނާއި ރައީސް ޞާލިހާއި ސަރުކާރަށް ވާޤިވެރިވާ ފަރާތްތައް ތިބެގެންކަމަށް ވާތީ، އެ މީހާ ރާއްޖެއިން ފުރުވައިލުމަކީ ކޮށްފާނެ ކަމެއް ކަމަށެވެ.
ހީނާ އިތުރަށް ވިދާޅުވީ، ޕީޕީއެމްއިން ގޮވައިލަނީ ރައީސް ޔާމީންގެ ފުރާނައަށް ނުރައްކާ ވާގޮތަށް އިންޒާރުދިން މައްސަލަ ސީރިޔަސް މައްސަލައެއްގެ ގޮތުގައި އަވަހަށް ބަލައިދިނުން ކަމަށެވެ.
ބަލަނާންގާނެނު އިނޒާރުދެނީވެސް އެމީހުނޭ