"ހަމައެކަނި އިންޑިއާ" ޕޮލިސީއަކީ ޤައުމު އަޅުވެތި ކުރުން: ރައީސް ޔާމީން
ރާއްޖެއިން އަބަދުވެސް ގެންގުޅެމުން އަންނަ "އިންޑިއާ ފުރަތަމަ" ސިޔާސަތަށް އެމަނިކުފާނު ވެސް ތާއީދު ކުރައްވާ ކަމަށާއި އެހެން ނަމަވެސް މިހާރު ފެންނަމުންދަނީ "ހަމައެކަނި އިންޑިއާ" ސިޔާސަތެއް ކަމަށާއި އެެ ސިޔާސަތަކީ ޤައުމު އަޅުވެތި ކުރުން ކަމަށް އިދިކޮޅު ލީޑަރު ، ރައީސް ޔާމީން ވިދާޅުވެއްޖެއެވެ.
މީގެ ދެ ދުވަސް ކުރިން ޓްވިޓަރ ބޭނުން ކުރައްވަން ފެއްޓެވި ރައީސް ޔާމީން މިހެން ވިދާޅުވީ، މިއަދު އެކުރެއްވި ޓްވީޓެއްގައެވެ.
އިންޑިއާއިން ރާއްޖޭގެ ދާޚިލީ ކަންކަމުގެ ތެރެއަށް އަތް ބާނާ ކަމަށް މީގެ ކުރިން ވެސް ރައީސް ޔާމީން ވަނީ އެތައް ޕޯޑިއަމްއެއްގައި ވިދާޅުވެފައެވެ. އަދި އިންޑިއާގެ އަސްކަރިއްޔާއިން ރާއްޖޭގައި ހަރަކާތްތެރިވަމުންދާތީ، އެކަމާ ދެކޮޅަށް "އިންޑިއާ. އައުޓް" ކެންޕެއިނެއް އެ މަނިކުފާނު އިސްކޮށް ހުންނަވާ ކުރިޔަށް ގެންދަވައެވެ.
"އިންޑިއާ ފަސްޓް" ޕޮލިސީއަކީ ކޮންމެ ކަމެއްގައި ވެސް އަވަށްޓެރި އިންޑިއާއަށް އެންމެ ފުރަތަމަ ބަރޯސާވާ ސިޔާސަތެކެވެ. ރައީސް ޔާމީންގެ ވެރިކަމުގައި ވެސް މި ސިޔާސަތަށް އަމަލުކުރިއެވެ. ނަމަވެސް ރައީސް ޔާމީންގެ ވެރިކަން ނިމުމާ ހަމައަށް އައިއިރު، ޗައިނާއާ އެކު ބާއްވަމުން ދިޔަ ގުޅުމުގެ ސަބަބުން އިންޑިއާގެ ނަފުރަތު އިތުރުވެ ގުޅުން އޮތީ ހީނަރުވެފައެވެ. ރައީސް ޔާމީންގެ ވެރިކަމުގައި އެމަނިކުފާނާ ދެކޮޅަށް ހިނގައިދިޔަ ސިޔާސީ އެކި ކަންތައްތަކުގައި އިންޑިއާގެ އެހީތެރިކަން ދީފައިވާކަމަށް ޕީޕީއެމްއިން ތުހުމަތުކުރެއެވެ.
