ކެމްޕޭންގައި ފައްޔާޒު މީހުން ދިރިއުޅޭ ހުރިހައި ރަށަކަށް ދަތުރުކޮށްފި

އެމްޑީޕީގެ ޗެއާޕާސަން އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއިލް ކެމްޕޭންގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ޒިޔާރަތްކުރައްވައިފިއެވެ.

Ads by MWSC

ފައްޔާޒާއެކު ކެމްޕެއިންގައި އެންމެ އިސްކޮށް އުޅުއްވަނީ އެމްޑީޕީގެ އަންހެނުންގެ ރޫހުގެ ރައީސްކަމަށް ވާދަކުރައްވާ އައްޑޫ މީދޫގެ ދާއިރާގެ މެމްބަރު ރޮޒެއިނާ އާދަމްއެވެ. އެ ދެ ބޭފުޅުން ކެމްޕޭން ކުރިއަށް ގެންދަނީ "ހިންގާލަން" ޝިއާރުގެ ދަށުންނެވެ.

ފައްޔާޒު ވިދާޅުވީ ހިންގާލުމުގެ ސިލްސިލާއިން ރާއްޖެ ވަށާ ޖެހުނު ފަހު ދަތުރު ނިންމައިލީ ކޮޅުމަޑުލުން ކަމަށެވެ.

"މުޅިރާއްޖޭގައި އެމްޑީޕީ ހިންގާލުމަށް އެދި ތިބި މެމްބަރުންގެ އަޒުމާ ހިތްވަރަށް ސާބަހާ ޝުކުރު ދަންންވަން" ފައްޔާޒު ވިދާޅުވިއެވެ.

މި އިންތިހާބުގައި ފައްޔާޒާއެކު ދެން ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިހާޒު ފަހުމީ (އިންތި) ވެސް ވަނީ ކެމްޕޭނުގައި ރާއްޖޭގެ ހުރިހާ ރަށަކަށް ދަތުރުކުރައްވައިފައެވެ. ކެމްޕެއިންގައި އިންތި އެންމެ ފަހު މަންޒިލަކަށް ވަޑައިގެންފައި ވަނީ ހދ. މަކުނުދުއަށެވެ. ފައްޔާޒު ވަޑައިގެންނެވީ ތ. ބުރުނީއަށެވެ.

މި އިންތިހާބުގެ ފޯރިގަދަވެފައިވާ އިރު ރައީސް ނަޝީދު ތާއީދު ކުރައްވަނީ އިންތިއަށެވެ. ރައީސް ޞާލިޙް ތާއީދު ކުރައްވަނީ ފައްޔާޒަށެވެ. އެއާ އެކު، އިންތިހާބުގެ ފޯރިގަދަވެ އެމްޑީޕީ ދެ ފެކްޝަނަކަށް ބެހި އެއް ބަޔަކު އަނެއް ބަޔަކަށް ދަނީ ބޮޑެތި ތުހުމަތުތައްކޮށް ވަރަށް ބޮޑަށް ފާޑު ވެސް ކިޔަމުންނެވެ.

ދެ ކެނޑިޑޭޓުން ވެސް ފޯރިއާއެކު ކެމްޕޭން ކުރިއަށްގެންދާއިރު، މިރެއާއި މާދަމާ ދެ ކެނޑިޑޭޓުންގެ ދެމެދުގައި ބަހުސެއް ބޭއްވުމަށް ވަނީ ނިންމައިފައެވެ.