އިންތި ކޮށްފައި ހުރި މެސެޖްތައް އެބަހުރި: ފައްޔާޒް
ގާތް މީހަކަށް ވަޒީފާ ހޯދައިދޭން އެމްޑީޕީގެ ޗެއަރޕާސަންކަމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ، ހަމަ މި އިންތިޚާބުގައި ވާދަ ކުރައްވާ ފައްޔާޒް އިސްމާއީލަށް ކޮށްފައި ހުރި މެސެޖްތައް އެބަހުރިކަމަށް ފައްޔާޒް ވިދާޅުވެއްޖެއެވެ.
ސަންގު ޓީވީއިން ކުރިޔަށް ދިޔަ ސަންގު ބަހުސްގައި ގާތް މީހަކަށް ވަޒީފާ ހޯދާ ދިނުމަށް އިމްތިޔާޒު ފަހުމީ ކުރައްވާފައިވާ، ލީކުވެފައިވާ މެސެޖާ ގުޅޭގޮތުން ސުވާލު ކުރުމުން އިންތި ވިދާޅުވީ، ގާތް މީހަކަށް ވަޒީފާ ހޯދަން މެސެޖް ކުރިކަމަށް ބުނާ އިރު އެ ބުނާ މީހަކަށް ވަޒީފާ ލިބުނުތޯ ވެސް ބަލަން ޖެހޭނެ ކަމަށެވެ.
"އަޅުގަނޑު ވަރަށް ސާފުކޮށް މި ދަންނަވަަނީ އެމްޑީޕީގެ ކުރީގެ ސަރުކާރުގައި ވެސް އަދި މި ސަރުކާރުގައި ވެސް އެއްވެސް މީހަކަށް ހޯދައިދިން ވަޒީފާއެއް ނޯންނާނެ." އިންތި ވިދާޅުވިއެވެ.
އިންތިގެ ވާހަކަތަކަށް ރައްދު ދެއްވަން ލިބުނު ފުރުސަތުގައި އިކޮނޮމިކް މިނިސްޓަރ ފައްޔާޒް ވިދާޅުވީ ފިނޭންސް މިނިސްޓްރީގެ މަގާމަކަށް މީހަކު އައްޔަން ކުރައްވަން އިންތި ގުޅުއްވައި މެސެޖު ވެސް ކުރެއްވި ކަމަށެވެ.
"އިންތި އަޅުގަނޑަށް ވެސް ގުޅުއްވިއޭ އިނގޭތޯ، އިންތި ފިނޭންސް މިނިސްޓްރީގެ ޑެޕިއުޓީ މިނިސްޓަރަކަށް އައްޔަން ކުރައްވައިފައި އެ ހުރީ ، މި ހުރީ އަނެއްކާ ވެސް އަޅުގަނޑުގެ ފޯނުގައި އިންތި ގުޅައި ކުރި މެސެޖުތައް... އެ ވަޒީފާ އެގޮތަށް ހަމަޖައްސަން، އެވަޒީފާ އެގޮތަށް ހަމަޖެހިފައި އެ އޮތީ.. ދެން ތިހާ ދޮގު ހަދާކަށް ނުވާނެ އިންތި" ފައްޔާޒް ވިދާޅުވިއެވެ.
މާދަމާ އޮންނަ ޗެއަރޕާސަންގެ އިންތިޚާބުގައި ވާދަ ކުރާ ދެ ކެނޑިޑޭޓުން ވެސް ވަނީ ވަރަށް ވަރުގަދަ ކެންޕެއިނެއް ކޮށްފައެވެ. ދެ ކެނޑިޑޭޓުން ވެސް ވަނީ މީހުން ދިރިއުޅޭ ހުރިހައި ރަށަކަށް ދަތުރު ކުރައްވައިފައެވެ.
