މަޖިލީހުގައި ދައްކާހާ ވާހަކަތައް ތެދު ކަމަށް ޤަބޫލުކުރަން ހެޔޮ ނުވާނެ: ރޮޒައިނާ
ރައްޔިތުންގެ މަޖިލީހުގައި ދައްކާހާ ވާހަކައެއް ތެދުކަމަށް ޤަބޫލު ކުރަން ހެޔޮ ނުުވާނެ ކަމަށާއި، އަމިއްލަފުޅަށް މަޖިލިސް ވެބްސައިޓަށް ވަަޑައިގެން މަޖިލީހުގައި ހިނގާ ކަންކަން ބެލުމަށް އައްޑޫމީދޫ ދާއިރާގެ އެމްޑީޕީގެ މެމްބަރު ރޮޒައިނާ އާދަމް ގޮވާލައްވައިފިއެވެ.
ރޮޒައިނާ މިފަދައިން ވިދާޅުވެފައިވަނީ ޖިނާއީ އިޖުރާއަތުގެ ޤާނޫނަށް ހުށަހަޅާފައިވާ އިސްލާހަށް ރައްޔިތުންގެ މަޖިލީހުގައި ވާހަކަފުޅު ދައްކަވަމުންނެވެ.
ރޮޒައިނާ ވިދާޅުވީ، މިއަދު ޖިނާއީ އިޖުރާއަތުގެ ޤާނޫނަށް ރަނގަޅު އިސްލާޙް ތަކެއް ހުށަހެޅުމުން، އޭގެ މަފްހޫމް އޮޅުވާލައިގެން ވާހަކަ ދައްކަމުން އަންނަ ކަމަށެވެ. އަދި މަޖިލީހުގައި ދައްކާ ވާހަކަތައް ޤަބޫލުނުކޮށް، އަމިއްލައަށް ޤާާނޫނު ބެލުމަށް ރޮޒައިނާ އިސްތިމާސް ކުރެއްވިއެވެ.
މިއަދުގެ ޖަލްސާގައި ރޮޒައިނާ އިތުރަށް ވިދާޅުވީ، މިއަދުގެ ސަރުކާރުން ޤާނޫނުތަކަށް އިސްލާޙް ގެންނަނީ ޕީޕީއެމްގެ ވެރިކަމުގައި ގޯހުން ކޮށްފައިވާ ކަންތައްތަކެއް ރަނގަޅު ކުރުމަށް ކަމަށެވެ. އަދި މަޖިލީހުގައި އިދިކޮޅަށް ޖާގަ ނެތް ކަމަށް އެ ބޭފުޅުން ދައްކަވާ ވާހަކަފުޅަށް ރައްދު ދެއްވިއެވެ.
"މިހާރު ވެސް ކޮމިޓީތަކަށް ކޮންމެ ޕީޕީއެމް މެންބަރަކު ވިޔަސް، އަދި އަމިއްލަ މެންބަރަކު ވިޔަސް މައްސަލައެއް ބަލަން ހުށަހަޅައިފި ކަމަށް ވަންޏާ، އެ މައްސަލައެއް ކޮމިޓީތަކުގައި އެދަނީ ކުރިޔަށް. އެހެންވީމަ، މި ބޭފުޅުންނަށް ޖާގަ ނުދީއެއް ނޫން މި މަޖިލިސް ކުރިޔަށް މިދަނީ." ރޮޒައިނާ ވިދާޅުވިއެވެ.
އިދިކޮޮޅުން މަޖިލީހުގެ ތަޅުމަށް ވައްދާހާ މައްސަލައެއް ބަލައިގަންނަށް ނުޖެހޭކަމަށް ވިދާޅުވެ ރޮޒައިނާ ވިދާޅުވީ، އެ ފަރާތްތަކުން ވެސް ރަނގަޅު މައްސަލައެއް ހުށަހަޅާނަމަ އެކަމަށް ޖާގަ ދޭ ކަމަށެވެ.
ގައުމީ އެއާލައިން ގެއްލުމުގައި ހިންގާތީ މިއަދު މަޖިލީހަށް ކުއްލި މައްސަލައެއް ހުށަހެޅިއިރު އެކަމާ ގުޅޭގޮތުން ރޮޒައިނާ ވިދާޅުވީ ޕީޕީއެމްގެ ވެރިކަމުގައިވެސް ގައުމީ އެއާލައިން ހިންގީ ގެއްލުމުގައި ކަމަށެވެ. ގައުމީ އެއާލައިނުން ސަބްސިޑައިޒް ކޮށްގެން އެއާލައިން ހިންގަނީ ފައިދާ ނުވާތީ ކަމަށާއި، އެއީ އަބަދުވެސް ހިންގާ ގޮތްކަމަށް ވިދާޅުވިއެވެ.
ބުރުގާ ނާޅައި ތިހެން އުޅެން ހެޔޮ ނުވާނެ