އެމްއެންޕީއަކީ ތަސައްރަފު ފުދިފައިވާ ޕާޓީއެއް: ނާޒިމް
މިއަދު ފެނިގެންދަނީ މޯލްޑިވްސް ނެޝަނަލް ޕާޓީ (އެމްއެންޕީ) އަކީ ސިޔާސީ ގޮތުން ތަސައްރަފު ފުދިފައިވާ ޕާޓީއެއްކަންކަމަށް އެ ޕާޓީގެ ރައީސް އަދި ދަނގެތީ ދާއިރާގެ މެންބަރު ކާނަލް މުޙައްމަދު ނާޒިމް މިއަދު ވިދާޅުވެއްޖެއެވެ.
އެމްއެންޕީގެ ޤައުމީ ހިންގާ ކައުންސިލް އިންތިޚާބުގެ ވޯޓުލުން ރާއްޖޭގެ އެކި ކަންކޮޅުތަކުގައި ފެށިގެން ކުރިޔަށްދާތީ އެކަމާ ގުޅިގެން ކުރެއްވި ޓުވީޓެއްގައި ނާޒިމް ވިދާޅުވީ އެމްއެންޕީގެ ފުރަތަމަ އިންތިޚާބު މިއަދު ކުރިއަށް ދާތަން ދެކެނީ ފަޚުރުވެރިކަމާއެކު ކަމަށެވެ.
އަދި މިއަދު ފެނިގެންދަނީ އެ ޕާޓީއަކީ ޑިމޮކްރެޓިކް ހަމަތައް ނަގަހައްޓާ ޕާޓީއެއް ކަމަށާއި, އެ ޕާޓީއަކީ ސިޔާސީ ގޮތުން ތަސައްރަފު ފުދިފައިވާ ޕާޓީއެއްކަން ކަމަށް ވެސް ނާޒިމް ވިދާޅުވިއެވެ.
''މި މުހިންމު އިންތިޚާބުގައި ޕާޓީގެ ވީހާ ވެސް ގިނަ މެންބަރުން ބައިވެރިވުން މުހިންމު.'' އޭނާ ވިދާޅުވިއެވެ.
އެމްއެންޕީ އުފެދުނީ މިދިޔަ އަހަރުގެ ފަހުކޮޅުގައެވެ. އެ ޕާޓީއަކީ ނާޒިމް އިސްވެ ހުންނަވައި އުފެއްދެވި ޕާޓީއެކެވެ.
