ބާކީ އޮތް ދުވަސްކޮޅުގައި އިސްކަމެއް ދޭނީ ސިއްހީ ދާއިރާ ހަރުދަނާކުރަން: ރައީސް
ދައުުރުގައި ބާކީ އޮތް ދުވަސްކޮޅުގައި އެންމެ ބޮޑު އިސްކަމެއް ދެއްވާނީ ސިއްހީ ދާއިރާ އިތުރަށް ހަރުދަނާކުރެއްވުމަށް ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ސިއްހީ މަރުކަޒުތަކަށް ޢައްޔަންކުރައްވާފައިވާ އިސް ވެރިންނާއެކު ބޭއްވެވި ބައްދަލުވުމުގައި ރައީސް ވިދާޅުވީ ސިއްހީ ދާއިރާގައި އަދިވެސް އިތުރަށް ރަނގަޅުކުރަން ހުރި ކަންކަން އެބަހުރި ކަމަށެވެ. ނަމަވެސް ސަރުކާރުން މިހާރު ވެސް ސިއްހީ ދާއިރާއަށް ބޮޑެތި ބަދަލުތަކެއް ގެނެސްފައިވާކަމަށް އެ މަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި ވަނީ ސިއްހީ ޚިދުމަތްތަކުގެ ފެންވަރު ރަނގަޅު ކުރުމަށާއި, ދާއިރާއަށް ގެންނަންޖެހޭ ބަދަލުތައް ގެނައުމަށް އަންނަ އަހަރު ޚާއްސަ އިސްކަމެއް ދެއްވާނެކަމަށް ވެސް ވިދާޅުވެފައެވެ.
މީގެ އިތުރުން ރައީސް ވަނީ ކުރިއަތް އޮތް ދުވަސްތަކުގައި ސިއްހީ ދާއިރާއަށް ހެޔޮ ބަދަލުތަކެއް ގެނެސްދެއްވާނެކަމުގެ ޔަޤީންކަން ވެސް ބައްދަލުވުމުގެ ބައިވެރިންނަށް ދެއްވައިފައެވެ.
އެ ބައްދަލުވުމުގައި ސިއްހީ މަރުކަޒުތަކުގެ އިސްވެރިން ވަނީ ސިއްހީ މަރުކަޒުތަކުގެ ލެވަލް އަޕްގްރޭޑްކުރުމާއި، މުވައްޒަފުން މަދުވުމުގެ މައްސަލައާއި، މޮބައިލް ލެބޯޓްރީގެ ޚިދުމަތާއި, ބޭސް ލިބުމުގައި ކުރިމަތިވާ ބައެއް ދަތިތަކާއި، ޕަބްލިކް ހެލްތް ޔުނިޓްތަކުގެ މަސައްކަތްތައް އިތުރަށް ހަރުދަނާކޮށް ގެންދިއުމަށް ބޭނުންވާ ބައެއް ކަންކަމާއި، ބައެއް ޚިދުމަތްތަކާއި ވަސީލަތްތައް ލިބުމުގައި ކުރިމަތިވާ ބައެއް ދަތިތައް ފާހަގަކުރައްވައިފައެވެ.
ޓާސަރީ ހޮސްޕިޓަލް ހަދާ އެ ތަންތަނަށް ބޮޑް އައްޔަންކޮށް ބަޔަކަށް ބޮޑު މުސާރަ ދިނަކަސް ހޮސްޕިޓަލެއް ނުހިގާނެ. އިއްޔެ ގއ. ވިލިގިލީގަ ކުއްޖެއްގެ ފައި ބުރިވެގެން ފަހާލާނެ ރޮދިކޮލެއް އަތޮޅު ހޮސްޕިޓަލުން ނުލިބުނުތާގަ ރީޖަނަލް ހޮސްޕިޓަލަކުންވެސް ނުލިބުނު. ސިއްހީހާލަތު މިހާ ދަށުދަރަޖަ އަކަށް ވެއްޓިއްޖެ. އަތޮޅުހޮސްޕިޓަލް ކިޔަސް ރީޖަނަލް ހޮސްޕިޓަލް ކިޔަސް ޓާސަރީ ހޮސްޕިޓަލް ކިޔަސް ނަމަކުން ވާނެ ކަމެއް އޮވޭތަ. އެމްޑިޕީ އަކީ އަބަދުވެސް ނަމުންކުރާގޮތް ދައްކާފަ ގައުމު ބަގުރޫޓް ކުރާބައެއް.