ލޯންޗު ބަންޑުން ޖަހައިލުން: ގެއްލުނު ޒުވާނާގެ ވަނަވަރު ޢާންމުކޮށްފި
އއ.މާޅޮހުގެ ދެކުނުން ލޯންޗެއް ބަންޑުން ޖަހައިލި ހާދިސާގައި ގެއްލިގެން ހޯދަމުން އަންނަ ޒުވާނާގެ ވަނަވަރު އެމްއެންޑީއެފުން މިއަދު ޢާންމުކޮށްފިއެވެ.
ދެ ފިރިހެނުން ތިބި އެ ލޯންޗު މިދިޔަ ބުރާސްފަތި ދުވަހު މާލެއިން އުކުޅަހަށް ދަތުރުފެށީ މެންދުރުފަހު 13:30 ގައެވެ.
އޭގެފަހުން އެ ލޯންޗު ބަންޑުން ޖަހާލައިފައި އޮއްވާ ފެނުނީ އިއްޔެގައެވެ. އެ ލޯންޗުގައި ތިބި ދެ މީހުން ގެއްލިގެން ހޯދަމުން ދަނިކޮށް އެކަކު ފެނުނީ އއ.ފެރިދޫ ފުއްޓަރާ ދިމާއިންނެވެ. އަނެއް މީހާ އަދިވެސް ފެނިފައެެއް ނުވެއެވެ.
އެ މީހާގެ ވަނަވަރު ޢާންމުކޮށް އެމްއެންޑީއެފުން މިއަދު ބުނީ ގެއްލިގެން ހޯދަނީ މިންހާ/ސ.ހިތަދޫ މުޙައްމަދު މިންހާޖު (28 އ) ކަމަށެވެ. އޭނާ ލައިގެން ހުރީ އަޅި ކުލައިގެ އަތްދިގު ޓީޝާޓަކާއި ނޫކުލައިގެ ޖިންސެއް ކަމަށެވެ.
އެމްއެންޑީއެފުން ބުނީ އޭނާ ހޯދަން މިހާރު 35 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށެވެ.
