ޝުޖާއު, އިމްރާނަށް: ''ހަލާލު ފޯމު'' ހަމަކޮށްފައި ރައީސް ޔާމިނާ ޗެލެންޖުކުރޭ
ހަލާލު ގޮތުގައި ޢަދާލަތު ޕާޓީއަށް މެންބަރުން ހަމަކުރެއްވުމަށްފަހު, ރައީސް ޔާމިން ޢަބްދުލްޤައްޔޫމާއި ޗެލެންޖު ކުރެއްވުމަށް ވިދާޅުވެ ޕީއެންސީގެ ނައިބު ރައީސް އިބްރާހިމް ޝުޖާއު ހޯމް މިނިސްޓަރު އިމްރާނަށް ވަރުގަދަ ރައްދެއް ދެއްވައިފިއެވެ.
ރޭގެ ވަގުތެއްގައި ކުރެއްވި ޓުވީޓެއްގައި ޝުޖާއު ވިދާޅުވީ ޢަދާލަތު ޕާޓީގެ ރައީސް ލޮލަށް ނިދިނައިސްގެން އުޅެނީ ޕީޕީއެމްގެ މެންބަރުން ވަގަށް ނަގައިގެން އެ ޕާޓީއަށް ބަދަލުކުރި ވާހަކަ ދައްކާތީ ކަމަށެވެ.
ޝުޖާއު ވިދާޅުވި ގޮތުގައި ޢަދާލަތު ޕާޓީއަކީ ރައްޔިތުންގެ ތާއީދު އޮތް ޕާޓީއެއް ނޫނެވެ. އެހެންކަމުން ސައިޒުގައި ހުންނެވުމަށް ޝުޖާއު ވިދާޅުވިއެވެ.
''ސައިޒުގަ ހުރޭ. ތީ ތާއީދު އޮތް ޕާޓީއެއް ނޫން.'' އިމްރާނަށް އަމާޒުކުރައްވައި ކުރެއްވި ޓުވީޓުގައި ޝުޖާއު ވިދާޅުވިއެވެ.
''ހަލާލު ފޯމު ހަމަކޮށްފައި ރައީސް ޔާމިނާ ޗެލެންޖު ކުރާނީ.'' ޝުޖާއު އިތުރަށް ވިދާޅުވެފައިވެއެވެ.
ދާދިފަހުން އިމްރާން ވަނީ ރައީސް ޔާމީނަށް ބާރެއް ލިބިވަޑައިގެންފިނަމަ އިސްލާމްދީނުގެ އެތައް ކަމެއް ބަދަލުކުރައްވާނެކަމަށް ވިދާޅުވެފައެވެ. އިމްރާންގެ އެ ވާހަކައާ ގުޅިގެން ދީނީ ޢިލްމުވެރިންގެ ފާޑުކިޔުންތައް ވެސް ވަނީ އަމާޒުވެފައެވެ.
