ދައުރު ނިމޭއިރު އަސާސީ ޚިދުމަތްތައް ހުންނާނީ ގާއިމުވެފައި: ސަރުކާރު

މި ފަސް އަހަރު ނިމޭއިރު ރައްޔިތުންނަށް ބޭނުންވާ އަސާސީ ޚިދުމަތްތައް ހުންނާނީ ގާއިމުވެފައިކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު މިއަދު ވިދާޅުވެއްޖެއެވެ.

Ads by STELCO

ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ހއ.އިހަވަންދޫގައި ރައީސް ޔާމީން ޢަބްދުލްޤައްޔޫމް ދެއްކެވި ވާހަކަފުޅަކާ ގުޅިގެން ސުވާލު ކޮށްފައެވެ.

މިއުވާން ވިދާޅުވީ ރައީސް ޔާމީން ވަރަށް ގިނަ ވާހަކަފުޅުތައް ދައްކަވައިފި ކަމަށާއި އެއިން ކޮންމެ ވާހަކަފުޅަކަށް އެއްޗެއް ދަންނަވަން ދަތި ކަމަށެވެ.

މިއުވާން ވިދާޅުވީ އިހަވަންދުއަށް ވަޑައިގެން ދެއްކެވި ވާހަކަފުޅުގައި އައިސް ޕްލާންޓާއި, ބަނދަރުގެ ވާހަކަ ފާހަގަކުރެއްވި ކަމަށާއި, ދެވަނަ ދައުރެއްގަ އެކަންކަން ކުރައްވާނެކަމަށް ރައީސް ޔާމީން ވިދާޅުވި ނަމަވެސް އެކަންކަން އެ އޮތީ އެއްކޮށް ނިމިފައި ކަމަށެވެ.

''ރަށްރަށުގެ ރައްޔިތުންނަށް ޙަޤީޤަތުގަ ބޭނުންވާ ޚިދުމަތްތައް އޭރު [ޕީޕީއެމްގެ ސަރުކާރުގައި] ފޯރުކޮށްނުދެވޭ. އަޅުގަނޑު މި ދެންނެވީ މީހުން ދިރިއުޅޭ އާބާދީ ކުދި ރަށްރަށް އަދި ހަމަ މެދުމިނުގެ އާބާދީ ވެސް.. މާލެއިން ބޭރުގެ އެހެން ހިސާބުތަކުގެ ރައްޔިތުންނަށް އެ ބޭނުންވާ އަސާސީ ޚިދުމަތްތައް ފޯރުކޮށްނުދެއްވައި މާލެއަށް ކޮށްދިން ކަންތައްތަކުގެ ފޮޓޯތަކެއް ޖެހި ބެކްގްރައުންޑްގަ ބެކް ޑްރޮޕެއްގަ ކުރިމަތީގައި ހުންނަވައިގެން އެ ގޮތަށް ރަށަރަށަށް ވަޑައިގެން އަނެއްކާ ވެސް އަސާސީ ޚިދުމަތްތައް ފޯރުކޮށްދެއްވާނެކަމަށް އެ ވިދާޅުވާ ވިދާޅުވުން އަޅުގަނޑަކަށް ހިއެއްނުވޭ ރައްޔިތުން ގަބޫލުކުރާނެހެނެއް. ރައްޔިތުންނަށް ބޭނުންވާ އަސާސީ ޚިދުމަތްތައް ރަށްރަށުން އެ ލިބެންޖެހޭ އަސާސީ ޚިދުމަތްތައް އަޅުގަނޑުމެންގެ މި ފަސް އަހަރު ނިމިގެންދާއިރު އިރާދަކުރެއްވިއްޔާ ހުންނާނީ ގާއިމުވެފަ.''

މިއުވާން ވިދާޅުވީ ރަށްރަށަށް ފެނާއި ނަރުދަމާގެ ނިޒާމު ގާއިމު ކޮށްދެއްވާނެކަމަށް ނުވަތަ ބަނދަރު ގާއިމުކޮށްދެއްވާނެ ކަމަށް ނުވަތަ ބޭނުންވާ އަސާސީ ބޭސްފަރުވާގެ ޚިދުމަތްތައް ފޯރުކޮށްދެއްވާނެކަމަށް ރައީސް ޔާމީން ދެން ވަޢުދުވެވަޑައިގަންނަވާކަށް ނުޖެހޭނެ ކަމަށެވެ.

''އަޅުގަނޑުމެންގެ ސަރުކާރުން އެ ކަންކަން ކޮށްދެމުން މިދަނީ. ރައްޔިތުން އެކަން ބަލައިގަންނަމުން އެ ދަނީ. އެކަން ކަން އެ ގޮތަށް ކުރިއަށްދާނެ.'' މިއުވާން ވިދާޅުވިއެވެ.