އަބްދުﷲގެ މަރު: މިހާލަތުގަ އާއިލާއާ ހަށިގަނޑު ހަވާލުކުރުމަކީ މައްޔިތާއަށްވެސް އެންމެ ފައިދާ ހުރި ގޮތް
މިހާލަތުގަ އާއިލާއާ ހަށިގަނޑު ހަވާލުކުރުމަކީ މައްޔިތާއަށްވެސް އެންމެ ފައިދާ ހުރި ގޮތް ކަމަށް ޝައިޚު އަލީ ޒައިދު ވިދާޅުވެއްޖެއެވެ.
ޒައިދު މިފަދައިން ވިދާޅުވީ މި މަހުގެ 25 ވަނަ ދުވަހު ގދ. ހޯނޑެއްދޫއިން ހައްޔަރުކޮށް ފުލުހުންގެ ބެލުމުގެެ ދަށުގައި ހުއްޓާ މަރުވި އެ ރަށު އަބްދުﷲ ރަޝީދުގެ އާއިލާއިން އޭނާގެ ހަށިގަނޑު ހަވާލުކޮށްދިނުމަށް އެދެމުންދާ ދަނޑިވަޅެއްގައެވެ.
މިކަމާ ގުޅިގެން ޒައިދު ވިދާޅުވީ ރާޖިހު މަސްލަހަތަކާ ނުލައި މައްޔިތުން ވަޅުލުން ލަސްކުރުމަކީ ދީނީ ގޮތުން ރަނގަޅު ކަމެއް ނޫން ކަމަށެވެ. އެހެންކަމުން ވީ އެންމެ އަވަހަކަށް އާއިލާއާ ހަށިގަނޑު ހަވާލު ކުރަންޖެހޭ ކަމަށް ޒައިދު ވިދާޅުވިއެވެ.
ގދ. ހޯޑެއްދޫއިން އަބްދުﷲ ރަޝީދު ފުލުހުންގެ ބެލުމުގެ ދަށަށް ގެނެސްފައިވަނީ މަސްތުވާތަކެތީގެ މައްސަލައަކާއި ގުޅިގެން ފުލުހުން ހިންގި އޮޕަރޭޝަނެއްގައެވެ. އަބްދުﷲ ގެ ހަށިގަނޑު މާލެ ގެނައީ ޕޯސްޓްމޯޓަމަށް ފޮނުވަން ނަމަވެސް، އެކަން ކުރަން ބޭނުންނުވާ ކަމަށާއި ހަށިގަނޑު ހަވާލުކުރުމަށް އާއިލާއިން ދަނީ ފުލުހުންނަށް ތަކުރާރުކޮށް އެދެމުންނެވެ.
އަބްދުﷲ ރަޝީދުގެ ހަށިގަނޑު ބަލަން، ގަލޮޅު ސަހަރާ މޯޗަރީއަށް އޭނާގެ އާއިލާގެ މެމްބަރުން ވައްދަން ފުލުހުން ދެކޮޅު ހެދުމުން މައްސަލަ ވަނީ ހޫނުވެފައެވެ. އާއިލާގެ މެމްބަރުން މޯޗަރީއަށް ވައްދަން ފުލުހުން ދެކޮޅު ހެދުމުން މޯޗަރީ ދޮރުމައްޗަށް މީހުން އެއްވެ ނުރުހުންފާލުކޮށްފައިވެއެވެ.
