ޓެކްސް ބޮޑުކުރަން ވޯޓު ނުދޭން އެމްއެންޕީން ނިންމައިފި
އަންނަ ޖަނަވަރީ މަހުން ފެށިގެން ޖީއެސްޓީއާއި ޓީޖީއެސްޓީ ބޮޑުކުރަން ހުށަހެޅި ބިލަށް ވޯޓު ނުދިނުމަށް މޯލްޑިވްސް ނެޝަނަލް ޕާޓީ (އެމްއެންޕީ) އިން ނިންމައިފިއެވެ.
އެމްއެންޕީން މި ގޮތަށް ނިންމީ ރޭ ބޭއްވި އެ ޕާޓީގެ ޤައުމީ ހިންގާ ކައުންސިލުގެ ފުރަތަމަ ބައްދަލުވުމުގައެވެ.
އެމްއެންޕީން ވިދާޅުވެފައިވަނީ، ދައުލަތުން ޓެކްސް ބޮޑުކުރަން ހުށަހަޅާފައިވާ ބިލަށް ތާއީދު ނުކުރަން ނިންމާފައިވާ ކަމަށެވެ.
މަޖިލީހުގައި ތިއްބަވަނީ އެމްއެންޕީގެ ތިން މެންބަރުންނެވެ. އެއީ އެ ޕާޓީގެ ރައީސް, ދަނގެތީ ދާއިރާގެ މެންބަރު ކާނަލް ރިޓަޔާޑް މުޙައްމަދު ނާޒިމާއި, އެ ޕާޓީގެ ނައިބު ރައީސުންގެ ގޮތުގައި ތިއްބެވި ވިލިމާލޭ ދާއިރާގެ މެންބަރު އަޙްމަދު އުޝާމާއި ތިމަރަފުށީ ދާއިރާގެ މެންބަރު ޢަބްދުﷲ ރިޔާޟެވެ.
ސަރުކާރުގެ ފަރާތުން ހުށަހަޅާފައިވަނީ އަންނަ ޖަނަވަރީ މަހުން ފެށިގެން ޖީއެސްޓީ %6 އިން %8 އަށް އަދި ޓީޖީއެސްޓީ %8 އިން %16 އަށް ބޮޑު ކުރުމަށެވެ.
ސަރުކާރުން ފޮނުވި ގޮތަށް ބިލު ފާސްކުރަން، ކޮމިޓީގައި، ރިޔާސަތުން ވޯޓަށް އެހުމުން އެކަމަށް ތާއީދުކުރައްވައި 50 މެންބަރުން ވޯޓު ދެއްވިއެވެ. ނުފެންނަކަމަށް ވޯޓު ދެއްވީ 19 މެންބަރުންނެވެ.
ޓެކްސް ބޮޑުކުރަން ނުފެންނަކަމަށް ވޯޓު ދެއްވީ ރައީސް މުޙައްމަދު ނަޝީދު ފެކްޝަނުގެ 12 މެންބަރަކާއި ޕީޕީއެމްއާއި, ޕީއެންސީއާއި, އެމްއެންޕީގެ މެންބަރުންނާއި ޖޭޕީގެ މެންބަރެކެވެ.
ސަރުކާރުން ފޮނުވި ގޮތަށް ބިލު ފާސްކުރީ ބައެއް މެންބަރުން ބިލަށް ހުށަހެޅުއްވި އިސްލާހުތައް ބޭރުކޮށްލުމަށްފަހުއެވެ.
އެ ގޮތުން ނައިފަރު ދާއިރާގެ މެންބަރު އަޙްމަދު ޝިޔާމް ހުށަހެޅުއްވީ މިހާރު ހުރި ރޭޓުތަކުގައި ޓެކްސްތައް ނެގުމަށެވެ. އެކަމަކު އެ ހުށަހެޅުން ބޭރުކޮށްލީ 56 މެންބަރުންގެ ވޯޓާއެކުއެވެ.
އޭގެފަހުން މެދުހެންވޭރު ދާއިރާގެ މެންބަރު ޢަލީ އާޒިމް ހުށަހެޅުއްވީ ޓީޖީއެސްޓީގެ ގޮތުގައި %16 ގެ ބަދަލުގައި %14 ނެގުމަށެވެ. ނަމަވެސް 46 މެންބަރުން އެއާ ދެކޮޅަށް ވޯޓު ދެއްވުމާއެކު އެ ހުށަހެޅުން ވެސް ފާހެއްނުވިއެވެ. ދެން އާޒިމް ހުށަހެޅުއްވީ ގެސްޓު ހައުސްްތަކުން ނަގާ ޓީޖީއެސްޓީގެ ޢަދަދު އިތުރު ނުކުރުމަށެވެ. ނަމަވެސް 44 މެންބަރުންގެ ވޯޓާއެކު އެ ހުށަހެޅުން ވެސް ވަނީ ބޭރުކޮށްލައިފައެވެ.
މީގެ އިތުރުން ޓެކްސް ޤާނޫނަށް އަމަލުކުރަން ފަށާ ތާރީޚަކީ 2023 ވަނަ އަހަރުގެ އޭޕްރީލްކަމުގައި ހެދުމަށް އާޒިމް ހުށަހެޅުއްވި އިސްލާހު ވެސް ވަނީ 45 މެންބަރުންގެ ވޯޓާއެކު ބޭރުކޮށްލައިފައެވެ.
ޓެކްސް ފާސް ވިޔަ ނުދޭން ދެގޮތެއް އެބައޮތް އެއްގޮތަކީ ޓެކްސް ބިލާއި އިދިކޮޅު އެންމެން ޖަލްސާއަށް ހާޒިރު ނުވުން އެއީ ގާނޫނުއަސާސީގެ 87 ވަނަ މާއްދާ ބުނާ ގޮތުން ޓެކްސް ބިލްގެ ޖަލްސާގަބައިވެރިވާ 44 މެމްބަރުން ހާޒިރުވެ ތިބެން ޖެހޭނެ. އެއީ މަޖިލީހުގެ ޖުމްލަ މެމްބަރުންގެ ދެބައިކުޅައެއްބައި. ދެވަނަ ގޮތަކީ ސަރުކާރަށް ސަޕޯޓް ކުރާ މެމްބަރުންނަށްވުރެ އިދިކޮޅު ވޮޓް ގިނަވާގޮތަށް ވޯޓް ދިނުން. ރަނގަޅުގޮތަކީ ޓެސްސް ޖަލްސާގެ މެޖޯރިޓީ ގެއްލުމާލުން ނުވަތަ 44 މެމްބަރުން ހަމަވާގޮތަށް މަޖިލީހަށް ހާޒިރު ނުވުން.