ޗާގޯސް މައްސަލަ ''އަނބުރާ ޖެހުން'' ވާނީ މުސްތަހީލު ކަމަކަށް: ނާޒިމް
އަންނަ ރިޔާސީ އިންތިޚާބުގެ ކާމިޔާބުވެއްޖެނަމަ ޗާގޯސް މައްސަލައިގައި މި ސަރުކާރުން ނިންމި ނިންމުން އަނބުރާ ޖަހާނެކަމަށް ބުނި ނަމަވެސް, އެގޮތަށް އެކަން ނުކުރެވޭނެ ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް މުޙައްމަދު ނާޒިމް މިއަދު ވިދާޅުވެއްޖެއެވެ.
ނަޞްރުގެ ދުވަހާ ގުޅިގެން ދެއްވި ވީޑިއޯ މެސެޖެއްގައި ނާޒިމް ވިދާޅުވީ ރާއްޖޭގެ ސިޔާދަތަށް މިއަދު ދިމާވެފައިވާ އެންމެ ބޮޑު ނުރައްކަލަކީ ރާއްޖޭގ ކަނޑުން ބައެއް ގެއްލިގެން ދިއުމަށް ސަރުކާރުން ހުޅުވާލައިފައިވާ ފުރުސަތު ކަމަށެވެ. އަދި އެފަދަ ފުރުސަތެއް އެއްވެސް ވަރަކަށް ލިބޭނެ ގޮތަށް ސިޔާސަތު އެކުލަވައިނުލެއްވުމަށާއި މިހާރުގެ ސިޔާސަތަށް ރުޖޫޢަވުމަށް ސަރުކާރަށް ގޮވައިލައްވާކަމަށް ނާޒިމް ވިދާޅުވިއެވެ.
މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާ ކަމަށް ޤަބޫލުކޮށް 22 އޮގަސްޓު 2022 ވަނަ ދުވަހު ރައީސް ޞާލިޙް ވަނީ އެ ޤައުމުގެ ބޮޑުވަޒީރަށް ސިޓީއެއް ފޮނުއްވާފައެވެ. އެކަމަކު އެ މައްސަލައިގައި މީގެ ކުރިން ދެ ފަހަރެއްގެ މަތިން އދ. ގައި ރާއްޖެއިން ވޯޓުލާފައިވަނީ މޮރިޝަސްއާ ދެކޮޅަށެވެ.
ޗާގޯސް މައްސަލައިގައި ސަރުކާރުން ކަންކުރި ގޮތް ރައްޔިތުންގެ މަޖިލީހުގެ ޚާއްސަ ކޮމިޓީއަކުން ބެލުމަށް ގޮވައިލައްވައި ނާޒިމް ވަނީ ރައްްޔިތުންގެ މަޖިލީހަށް މައްސަލައެއް ވެސް ހުށަހަޅުއްވައިފައެވެ.
ވީޑިއޯ މެސެޖުގައި ނާޒިމް ވަނީ ސިޔާސީ ވާދަވެރިކަން އެއް ފަރާތްކޮށް ރާއްޖޭގެ ކަނޑުން ބައެއް ގެއްލިގެން ނުދާނެ ގޮތަށް އެންމެން އެކުގައި މަސައްކަތް ކުރުމަށް ވެސް ގޮވައިލައްވާފައެވެ. އަދި އެކަމަށް ހައްލެއް ނުހޯދިއްޖެނަމަ ޗާގޯސް މައްސަލައިގައި މި ސަރުކާރުން ނިންމި ނިންމުން އަނބުރާ ޖަހާނެކަމަށް ބުނި ނަމަވެސް އަނބުރާ ޖެހުން ވާނީ މުސްތަހީލު ކަމަކަށް ކަމަށް ނާޒިމް ވިދާޅުވިއެވެ.
''2023 ގަ އާ ސަރުކާރެއްގަ ޤައުމާ ހަވާލުވުމުގެ ކުރިން ޗާގޯސް މައްސަލައިގައި ފައިސަލާ ކުރުވަނިވި ނަތީޖާއަކަށް ވާސިލުވެއްޖެނަމަ އަޅުގަނޑުމެން އެއްވެސް މީހަކަށް ވެސް ނޫނީ ޕާޓީއަކަށް ވެސް މި މައްސަލަ އަނބުރާ ޖެހުން ވާނީ މުސްތަހީލުކަމަކަށް. ވީމަ ޕޯޑިއަމްތަކާ ދުރަށް ވަޑައިގެން އެކުގައި ދިވެހިންނާ ދިވެހި ޤައުމުގެ މަސްލަހަތު ހިމާޔަތް ކުރުމަށް މަސައްކަތް ކުރުމަށް އަޅުގަނޑު ތި ހުރިހާ ބޭފުޅުންނަށް އަވަސްވެގަތުމަށް ގޮވައިލަން.''
ނާޒިމް ވަނީ ޗާގޯސް މައްސަލައިގައި ދިވެހި ދައުލަތުން އިޚްތިޔާރުކުރާ ސިޔާސަތަކީ ރާއްޖޭގެ އެންމެ މަތީ މަސްލަހަތަށް އިސްކަން ދޭ ގޮތަށް ބައްޓަންކުރެވިގެންދާ ސިޔާސަތަކަށްވުމަށް އުންމީދު ކުރައްވާ ކަމަށް ވެސް ވިދާޅުވެފައެވެ.
ޗާގޯސް މައްސަލައިގައި މި ސަރުކާރުން ނިންމި ނިންމުމަށް އިހުތިރާމު ނުކުރައްވާާނެ ކަމަށާއި, ކިތަންމެ ކޯފާވިޔަސް ''ހަމަ ބޮލާލައި ޖަހާނެކަމަށް'' ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމް ދާދިފަހުން ވަނީ ވިދާޅުވެފައެވެ.
''ﷲ ގެ ރަޙްމަތާއެކީ 2023 ވަނަ އަހަރަކީ ދިވެހި ރައްޔިތުންގެ އަހަރެއް ކަމަށްވަންޏާ އަޅުގަނޑުމެނަށް ސަރުކާރު ލިބިއްޖެކަމަށްވަންޏާ ޤާނޫނާއި ޚިލާފަށް ޤާނޫނުއަސާސީއާ ޚިލާފަށް މިހާރު ސަރުކާރުން މި މައްސަލައިގަ ކޮށްގެން އުޅޭ ކަންތައް އަޅުގަނޑު އިޙްތިރާމެއް ނުކުރާނަން. އެކަން އަނބުރާ ޖަހާނަން.'' ޕީޕީއެމްއިން ބޭއްވި ޖަލްސާއެއްގައި ރައީސް ޔާމީން ވިދާޅުވެފައިވެއެވެ.
އެއްވެސް މީހަކަށް ނޫނީ ޕާޓީއަކަށް ވެސް ޗާގޯސް މައްސަލަ އަނބުރާ ޖެހުން ވާނީ މުސްތަހީލުކަމަކަށް ކަމަށް ނާޒިމް އެ ވިދާޅުވަނީ ރައީސް ޔާމީންގެ މި ބަސްފުޅަށް ޢިޝާރަތް ކުރައްވައިކަމަށް ބެލެވެއެވެ.
