އަމީތާބު މަސް ކެއުން ހުއްޓައިލިތާ ކިތަންމެ ދުވަހެއް
ބޮލީވުޑްގެ މެގަ ސްޓަރ އަމީތާބު ބައްޗަން ހުށަހަޅައިދޭ "ކޯން ބަނޭގާ ކަރޯޑް ޕަތީ"ގެ އެކި އެޕިސޯޑްތަކުގައި އަމީތާބު އޭނާގެ އަމިއްލަ ދިރިއުޅުމާ ބެހޭ ވާހަކަތައް ހިއްސާ ކުރެއެވެ. މިކަންވަނީ އެ ޝޯ ބަލާ ފަރާތްތަކުގެ ޝައުގުވެރިކަން އިތުރުކޮށްދޭ ކަމަކަށެވެ.
މި ޝޯގެ އެންމެ ފަހުގެ އެޕިސޯޑުގައި އޭނާ ވަނީ، އެންމެ ކަމުދާ ކެއުމާ ގުޅޭގޮތުން ވަރަށް ދިގުކޮށް ވާހަކަ ދައްކައިފައެވެ.
ޝޯގެ އެއް ބައިވެރިޔާ، ވިދުޔާ އުދޭ ކުރި މި ސުވާލަށް ދިން ޖަވާބުގައި އުމުރުން 80 އަހަރުގެ އެކްޓަރު ބުނީ އޭނާ އަކީ މިހާރު މާ މީރުކޮށް ކާ މީހެއް ނޫން ކަަމަށެވެ. އެހެންނަމަވެސް، އަންހެނުން ޖަޔާ ބައްޗަން މަސް ކެއުމަށް ވަރަށް ލޯބި ކުރާ ކަަމަށާއި، އޭނާ މަހާއި އަދިވެސް އިތުރު ބައެއް ބާވަތްތައް ކެއުން ހުއްޓާލިތާ ގިނަ ދުވަސްތަކެއް ވެއްޖެ ކަމަށެވެ.
އަމީތާބު ބުނިގޮތުގައި، މީރު ހުރިހައި އެއްޗެއް ކެެއުމަކީ ޒުވާން އުމުރުގައި މީހުން ކުރާ ކަމެއް ކަމަށާއި، އޭނާވެސް ކުރިން ގިނަ އެއްޗެހި ކައި އުޅުނު ކަމަށެވެ.
އަމީތާބު އިތުރަށް ބުނީ އޭނާ މިހާރު ބަތާއި، ފޮނި އެއްޗެއްސާއި ޕާންވެސް ނުކާ ކަމަށެވެ. އަދި އިތުރަށް ނުކާ އެއްޗެހީގެ ވާހަކަ ކުރިއަށް ނުގެންދާނެ ކަމަށްވެސް ބުންޏެވެ.
އަމީތާބުގެ ފިލްމީ މަސައްކަތްތަކަށް ބަލާއިރު، ދެން އެންމެ އަވަހަށް ސްކްރީނަށް އަންނާނީ އޭނާގެ ފިލްމު "އުންޗާއީ"އެވެ. ސޫރަޖް ބަރްޖަތުޔާގެ މި ފިލްމަކީ މައުންޓް އެވަރެސްޓަށް އަރަން މަސައްކަތް ކުރާ ތިން ރަޙްމަތްތެރިން ކުރާ މަސައްކަތް ދައްކުވައިދޭނެ ފިލްމެކެވެ.
