އަލިފާނުގެ ހާދިސާތައް ހުއްޓުވޭނީ ތޮއްޖެހުން ކުޑަކުރެވިގެން: ރައީސް
އަލިފާނުގެ ހާދިސާތައް ހުއްޓުވޭނީ މާލޭގައި އޮތް ތޮއްޖެހުމުގެ މައްސަލަ ހައްލުކުރެވިގެންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރޭ މާލޭގައި ހިނގި ހިތާމަވެރި އަލިފާނުގެ ހާދިސާއާ ގުޅިގެން ރައީސް ޞާލިޙް ވަނީ ހާލަތު ބެއްލެވުމަށްޓަކައި އެ ސަރަހައްދަށް ވަޑައިގެންފައެވެ. މީޑިއާތަކާ ވާހަކަދައްކަވަމުން ރައީސް ޞާލިޙް ވިދާޅުވީ މިފަަދަ ހާދިސާތައް މަދުކުރުމަށް ހައްލެއް ގެނެވޭނީ މާލޭގައި އޮތް ތޮއްޖެހުން ހުއްޓުވިގެންކަމަށެވެ. އަދި މިފަދަ ހާދިސާތައް ހުއްޓުވުމަށް އެޅެން ހުރި އިތުރު ފިޔަވަޅުތައް ހޯދާނެކަމަށް އެމަނިކުފާނު ފާހަގަކުރެއްވިއެވެ.
މީގެ އިތުރުން ރައީސް ޞާލިޙް ކުރެއްވި ޓްވީޓެއްގައި ވިދާޅުވީ ރޭ މާލޭގައި ހިނގި ނުރައްކާތެރި އަލިފާނުގެ ހާދިސާއަކީ ވަރަށް ހިތާމަވެރި ހާދިސާއެއް ކަމަށެވެ. އަދި އެތައް ބައެއްގެ ފުރާނަ ގެއްލި ގިނަ ޢަދަދެއްގެ ބަޔަކަށް ގެއްލުންތަކެއް ލިބިފައިވާ ކަމަށާއި މިހާދިސާ ހިނގައި ދިޔަގޮތް މިހާރު ބަލަމުންދާ ކަމަށް ވިދާޅުވިއެވެ.
މި އަލިފާނުގެ ހާދިސާގައި މަރުވި މީހުންގެ އަދަދު މިހާރު ވަނީ 11 އަރާފައެވެ. އަދި އެކަކަށް އައިޖީއެމްއެޗްގައި ފަރުވާދެމުން އަންނައިރު އޭނާގެ ހާލު ވަރަށް ސީރިއަސްކަމަށް އެ ހޮސްޕިޓަލާއި ހަވާލާދީ ފުލުހުން ވަނީ ވިދާޅުވެފައެވެ.
