ރައީސް ނަޝީދު ރާއީއަށް: ނޭކުރެންދޫގައި ހިނގަމުންދަނީ ރަން ޒަމާނެއް ނޫން
ހދ.ނޭކުރެންދޫގައި ރަންޒަމާނެއް ހިނގަމުންދާ ކަމަކަށް ދެކެވަޑައިނުގަންނަވާ ކަމަށް ރައްޔިތުން މަޖިލީހުގެ ރައީސް މުޙައްމަދު ނަޝީދު މިއަދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި މަކުނުދޫ ދާއިރާގެ މެންބަރު މުޙައްމަދު ރާއީ ވިދާޅުވީ މި ވޭތުވެގެންދާ ފަސް އަހަރަކީ ހަމަ ރަންޒަމާން ކަމަށެވެ.
ޢިއްޒަތްތެރި ރައީސްއަށް ވަރަށް ރަނގަޅަށް އެނގިލައްވާނެ މަކުނުދޫ ދާއިރާ ހަމަ ޒީރޯގަ [އޭގެ ކުރިން] އޮތީ.
ރާއީގެ ވާހަކަ މެދުކަނޑައިލައްވަމުން ރައީސް ނަޝީދު ވަނީ ނޭކުރެންދޫގައި ރަންޒަމާނެއް ހިނގަމުންދާ ކަމަކަށް ދެކެވަޑައިނުގަންނަވާ ކަމަށް ވިދާޅުވެފައެވެ.
ޢިއްޒަތްތެރި މެންބަރު އަޅުގަނޑަކަށް ރަންޒަމާން ކަން އެނގޭތޯ ނޫންތޯ އެ ގޮތަށް އެއްގޮތަކަށް ވެސް އަޅުގަނޑު ތި ބަހުސްގެތެރެއަށް ނުވެއްދުމަށް ވަރަށް ބޮޑަށް އެދެން. އަޅުގަނޑެއް ނުދެކެން ނޭކުރެންދޫގައި ރަންޒަމާނެއް ހިނގަމުންދާ ކަމަކަށް.
ރިޔާސަތުން އަނެއްކާވެސް ފުރުސަތު ދެއްވުމުން ރާއީ ވިދާޅުވީ އޭނާއެކޭ އެއްގޮތަށް ރައީސް ނަޝީދަށް ވެސް އޭނާގެ ދާއިރާ އެނގިވަޑައިގަންނަވާނެ ކަމަށެވެ. އަދި އެ ދާއިރާގެ ރައްޔިތުން މިއަދު ތިބީ ވަރަށް ވެސް އުފަލުން ކަމަށާއި މި ސަރުކާރުން ދާއިރާއަށް ގިނަ ކަންތައްތަކެއް ކޮށްދެއްވާފައިވާ ކަމަށެވެ.
