ޙައްޤުތައް ހޯދަން ސަލާންޖަހަންޖެހޭ ހިސާބަށް ގޮސްގެން ނުވާނެ: ނާޒިމް
ރައްޔިތުން ޙައްޤުތައް ހޯދުމުގައި ސަލާންޖަހަން ޖެހިގެން ނުވާނެކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް އަދި ރައްޔިތުން މަޖިލީހުގެ ދަނގެތީ ދާއިރާގެ މެންބަރު ކާނަލް ރިޓަޔާޑް މުޙައްމަދު ނާޒިމް ވިދާޅުވެއްޖެއެވެ.
ބައިނަލްއަގުވާމީ އިންސާނީ ޙައްޤުތަކާބެހޭ ދުވަހާ ގުޅިގެން ކުރެއްވި ޓުވީޓެއްގައި ނާޒިމް ވިދާޅުވީ ކޮންމެ ރައްޔިތަކަށް ވެސް އިންސާނީ ޙައްޤުތައް ހަމަހަމައަަށް ލިބެންޖެހޭ ކަމަށެވެ. އަދި ރައްޔިތުންނަށް ޙައްޤުތައް ލިބުމުގައި ދަތިތަކާއި ކުރިމަތި ކުރުވައި ނުވަތަ ޙައްޤުތަކުން ރައްޔިތުން މަހުރޫމުކޮށްގެން ނުވާނެ ކަމަށް ވެސް ނާޒިމް ވިދާޅުވިއެވެ.
ބައިނަލްއަގުވާމީ އިންސާނީ ޙައްޤުތަކާބެހޭ ދުވަހުގެ ތަހުނިޔާ ލޮބުވެތި ރައްޔިތުންނަށް ދަންނަވަން. އިންސާނީ ޙައްޤުތައް، ކޮންމެ ރައްޔިތަކަށްމެ ހަމަހަމައަަށް ލިބެންޖެހޭ. ރައްޔިތުންނަށް ޙައްޤުތައް ލިބުމުގައި ދަތިވެ، މަހުރޫމުވެ ނުވަތަ ސަލާންޖަހަން ޖެހިގެން ނުވާނެ.
ނާޒިމް މިހެން ވިދާޅުވިއިރު އިންސާނީ ޙައްޤުތަކުގެ ދާއިރާއިން ދިވެހި ދައުލަތުގެ އެންމެ އިސް ސިޔާސަތަކީ އަސާސީ ޚިދުމަތްތައް ދިނުމުގައި ދިވެހި ރައްޔިތުންގެ މެދުގައި އެއްވެސް ތަފާތެއް ނުކުރުން ކަމަށް ރައީސް އިބްރާހިމް މުޙައްމަދު ޞާލިޙް އިއްޔެ ވަނީ ވިދާޅުވެފައެވެ.
Ads by STO
