ކޮވިޑް-19: ސިފައިންތަކެއް ފައްސިވެ، ގިރިފުށި މޮނީޓަރިން އަށް
ސިފައިންގެ ތަމްރީނު މަރުކަޒު، ގިރިފުށީގައި ތިބި ސިފައިންގެ ބަޔަކު ކޮވިޑް-19 އަށް ފައްސިވެ އެރަށް މޮނިޓަރިންއަށް ގެންގޮސްފި އެވެ.
އޮންލައިން ނޫސް "އަވަސް" އިން ބުނެފައިވަނީ ކޮވިޑަށް ފައްސި ވެފައިވަނީ ސިފައިންގެ ހަތަރު މީހެއްކަން އެނގިފައިވާ ކަމަށާއި އެއީ ގިރިފުށީގައި ސިފައިންގެ ތަމްރީނުތައް ހަދަމުން ދިޔަ ސިފައިންގެ ބައެއްކަން ވެސް އެނގިފައިވާ ކަމަށެވެ.
ފައްސިވީ ސިފައިިންގެ ކޮންޓެކްޓް ޓްރޭސިންގ މިވަގުތު އެޗްޕީއޭ އާއި އެމްއެންޑީއެފް ގުޅިގެން މިހާރު ހިނގަމުންދާއިރު ގިރިފުށި ވަނީ މޮނީޓަރިންގެ ހާލަތައް ގެނެސްފައެވެ. އަދި މިހާލަތުގައި އެތަނަށް އެއްވެސް މީހަކު އަަރާފޭބުން މަނާ ވާނެއެވެ.
މީގެއިތުރުން އެެޗްޕީއޭގެ ގައިޑްލައިންތަކާއި އެއްގޮތްވާ ގޮތުގެ މަތިން އެތަން ޑިސްއިންފެކްޓު ކުރުމުގެ މަސައްކަތް ވެސް ވަނީ ފަށާފައެވެ.
މިކަމާއި ގުޅޭގޮތުން އެމްއެންޑީއެފްއިން އަދި ވަކި އެއްޗެއް ބުނެފައެއް ނުވެއެވެ.
ރާއްޖެއަށް ވެސް މިހާރު ކުރިމަތިވެފައިމިވާ ކޮވިޑްގެ ބަލިމަޑުކަމުގައި ފްރަންޓްލައިންގައި އެންމެ މުހިންމު ދައުރެއް އަދާކުރަމުންދާ އެއް މުއައްސަސާއަކީ ސިފައިންނެވެ. އެގޮތުންް ކޮވިޑްގެ ބަލި މީހުން އެއް ތަނުން އަނެއް ތަނަށް އުފުލުމާއި ކޮވިޑްގެ ބަލި މީހުން ތިބޭ ފެސިލިޓީތައް އެންމެ ބުރަކޮށް ބަލަހައްޓަމުން ގެންދާ އެއްބަޔަކީ ވެސް ސިފައިންނެވެ.
