ހައްޔަރުނުކުރިޔަސް، ބަންދު ނުކުރިޔަސް ވެރިކަން ކުރެވޭނެކަން މިދަނީ ދައްކަމުން: ރައީސް ޞާލިހް

ހައްޔަރު ނުކުރިޔަސް، ބަންދު ނުކުރިޔަސް ވެރިކަން ކުރެވޭނެކަން ސާބިތުކޮށްދެއްވާފައިވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

Ads by STELCO

އެމްޑީޕީގެ ރިޔާސީ ޕްރައިމަރީގެ ކެމްޕޭންގެ ތެރެއިން، މިރޭ އެމްޑީޕީ ހަރުގޭގައި ވާހަކަފުޅު ދައްކަވަމުން ރައީސް ވިދާޅުވީ އެއްވެ އުޅުމާއި ހިޔާލު ފާޅުކުރުމުގެ މިނިވަންކަން މިސަރުކާރުން ތަން މިނަށް ދީފައިވާކަމަށެވެ.

"ހިޔާލުފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަން އަޅުގަނޑުމެން މިވަނީ ތަންމިނަށް ހުޅުވައިފައި. ޖެހިގެން މިއޮތީ، ކުރިއަށް ގެންދަނީ އެއޮތް. އެއްވެސް މީހެއް ބަންދު ކުރޭތޯ އެބަ؟ އެއްވެސް މީހެއް ކުރޭތޯއެބަ؟ މިތާ އަޅުގަނޑުމެންނަށް ޖަލްސާ ނުބޭއްވިގެން މިއުޅެނީ. އެހެންނަމަވެސް އެމިނިވަންކަމާއެކީގައި އެބޭފުޅުންގެ ހިޔާލު ފާޅުކުރުމަށް އަޅުގަނޑުމެން މިވަނީ ޖާގަ ދީފައި. ހައްޔަރު ނުކުރިއަސް ބަންދު ނުކުރިޔަސް ވެރިކަން ކުރެވޭނެކަން އަޅުގަނޑު މިދަނީ ސާބިތު ކޮށްދެމުން."

އެމްޑީޕީ ހަރުގެ ކުރިމަތީގައިވާ އާރޓިފިޝަލް ބީޗްގައި އިދިކޮޅު ފަރާތްތަކުން ކުރިއަށްގެންދާ ޖަލްސާ އަށް އިޝާރާތް ކުރައްވައި ރައީސް ޞާލިހް ވިދާޅުވިއެވެ.

އިތުރަށް ވާހަކަ ދައްކަވަމުން ރައީސް ވިދާޅުވީ ސަރުކާރު ފެށުމާއެކުގައި ކޮންމެ ދުވަހަކު ސަރުކާރަށް ދަތި ކުރުމާއި އުނދަގޫކުރުމާއި ހުއްޓުމެއް ނެތި ރައްޔިތުންގެ ހިތުގައި ސަރުކާރާމެދުގައި ނަފުރަތު އުފެއްދެވުމަށްޓަކައި ޕާޓީ ތެރެއިން މަދު ބަޔަކުނަމަވެސް މަސައްކަތް ކުރަމުން އައިކަމަށެވެ.

"ސަރުކާރު ފެށުމާއެކުގައި. މިއީ އަޅުގަނޑު ދައްކަން ބޭނުންވާ ވާހަކައެއްވެސް ނޫން. އެހެންނަމަވެސް ކޮންމެ ދުވަހަކު ސަރުކާރަށް ދަތި ކުރުމާއި އުނދަގޫކުރުމާއި ހުއްޓުމެއް ނެތި ރައްޔިތުންގެ ހިތުގައި އަޅުގަނޑުމެންނާމެދުގައި ނަފުރަތު އުފެއްދެވުމަށްޓަކައި ޕާޓީ ތެރެއިން މަދު ބަޔަކު ނަމަވެސް އެކަން ކުރަމުން އައި. މިއީ ހަގީގަތް. މިއަދު އަޅުގަނޑު އެބޭފުޅުންނަށް ދަންނަވާނީ އެކަން ހުއްޓާލައްވާށޭ. ހުއްޓާލައްވާފައި އަޅުގަނޑުމެންނާއެކު ވަޑައިގެން ރައްޔިތުންނަށް ޚިދުމަތް ކުރުމުގައި ވެފައިވާ ވައުދުތައް ފުއްދުމަށްޓަކައި އެކީއެކީގައި ކުރިއަށް ދަމާ ހިނގާށޭ." ރައީސް ވިދާޅުވިއެވެ.

ރައީސުލްޖުމްހޫރިއްޔާ ބައިވެރިވެ ވަޑައިގެންނެވި ޖަލްސާ އެމްޑީޕީ ހަރުގޭގައި ކުރިއަށް ގެންދިޔަ ވަގުތު އިދިކޮޅުން ވަނީ އާރޓިފިޝަލް ބީޗުގައި ޖަލްސާ ކުރިއަށް ގެންގޮސްފައެވެ.