މަހަކު ލިބެނީ ކިހާ ފައިސާއެއްތޯ އެހުމުން ޝާހްރުކް ދިން ޖަވާބު
ބޮލީވުޑްގެ ކިންގް ހާންގެ ނަމުން މަޝްހޫރު އެކްޓަރ ޝާހްރުކް ހާން ޓްވިޓާއަށް ޖޮއިން ކުރިތާ 13 އަހަރު ފުރުން ފާހަގަކުރުމުގެ ގޮތުން އޭނާ ކުރިއަށް ގެންދިޔަ އާސްކް އެސްއާރުކޭ ސެޝަންގައި އޭނާގެ މުސާރައާއި ބެހޭގޮތުން ކުރި ސުވާލަށް ހައިރާން ކުރުވަނިވި ޖަވާބެއް ދީފިއެވެ.
ކުރިއަށް އޮތް ފިލްމް "ޕަތާން" އާއި އަދިވެސް ކުރިއަށް ހުރި ޕްރޮޖެކްޓްތަކާއި ބެހޭގޮތުން ގިނަ ސުވާލުތަކަކަށް ޝާހްރުކް ޖަވާބު ދިން މި ސެޝަންގައި އެންމެ ގިނަ މީހުން އަޅައިގަނެފައިވާ ސުވާލަކީ ޝާހްރުކަށް މަހަކުލިބޭ މުސާރައާއި ބެހޭގޮތުން ފޭނަކުކޮށްފައިވާ ސުވާލަކަށް އޭނާ ދީފައިވާ ޖަވާބެވެ.
"އަހަންނަށް ދުވާލަކު އަގުނުކުރެވޭހާ ގިނަ ލޯބި ލިބޭ" ޝާހްރުކް ބުނެފައިވެއެވެ.
މީގެ އިތުރުންވެސް މިސެޝަންގައި ޝާހްރުކްގެ ސަރނޭމް އާއި ބެހޭގޮތުން މީހަކުވަނީ ތަފާތު ސުވާލެއްކޮށްފައެވެ. މިގޮތުން އޭނާގެ އާއިލާއަކީ ކަޝްމީރަށް ނިސްބަތްވާ އާއިލާއެއް ކަމަށްވާއިރު ނަމުގެ ފަހަތަށް ހާން ލާފައިވަނީ ކޮން ސަބަބަކާ ހުރެތޯ އެހި ސުވާލަށް ޖަވާބުދެމުން އޭނާ ބުނީ މުޅި ދުނިޔެއަކީ ވެސް އޭނާގެ އާއިލާ ކަމަށާއި އާއިލާއިން ނަން ނުލިބޭކަމަށެވެ. އަދި ނަން ލިބެނީ ކުރާމަސައްކަތުން ކަމަށްވެސް އޭނާވަނީ ބުނެފައެވެ.
ޝާހްރުކްގެ ކުރިއަށް އޮތް ފިލްމް "ޕަތާން" ގެ ދެލަވައެއް މިހާތަނަށް ރިލީޒްކޮށްފައިވާއިރު އޭގެ ތެރެއިން އެއްލަވަ ކަމުގައިވާ "ބޭޝަރަމް ރަންގް" އަށް ގިނަ ބައެއްގެ ފާޑުކިޔުންވަނީ އަމާޒުވެފައެވެ. މިގޮތުން ލަވައިގައި ފެންނަ ގައިގޯޅި މަންޒަރުތަކާއި ނިވާކަން ކުޑަ ހެދުންތަކުގެ ސަބަބުން ފިލްމް "ޕަތާން" ބޮއިކަޓް ކުރުމަށްވެސް ބައެއް މީހުން ދަނީ ގޮވާލަމުން ކަން ފާހަގަކޮށްލެވެއެވެ.
