ބައެއް މަންޒަރުތައް އުނި ކުރުމަށްފަހު "ޕަތާން" އެޅުވުމުގެ ހުއްދަ ދީފި
މައްސަލަ ބޮޑުވެފައިވާ ބޮލީވުޑްގެ ފިލްމް "ޕަތާން" އިން ބައެއް މަންޒަރުތައް އުނިކޮށް ފިލްމް އެޅުވުމުގެ ހުއްދަ އިންޑިއާގެ ސެންޓްރަލް ބޯރޑް އޮފް ފިލްމް ސެޓިފިކޭޝަން (ސީބީއެފްސީ) އިން ދީފިއެވެ.
ބޮލީވުޑްގެ ހަބަރުތައް ގެނެސްދޭ ނޫހެއް ކަމުގައިވާ ބޮލީވުޑް ހަންގާމާއިން ރިޕޯޓްކޮށްފައިވާގޮތުގައި މިފިލްމްގެ 10 މަންޒަރެއް އުނިކޮށްފައިވާއިރު މީގެ ތެރޭގައި ނިވާކަން ކުޑަ ހެދުން އެޅިކަމަށް ބުނެ މައްސަލަ ބޮޑުވި ލަވަ "ބޭޝަރަމް ރަންގް"ގެ ތިން މަންޒަރެއް ވެސް ހިމެނެއެވެ. އަދި ފިލްމްގައި ބޭނުންކޮށްފައިވާ ބައެއް ބަސްބަސް ބަދަލުކޮށް ފިލްމް އެޅުވުމުގެ ހުއްދަ ދީފައިވަނީ މިމަހުގެ 2 ވަނަ ދުވަހުކަމަށް ވެސް އެނޫހުން ވަނީ ރިޕޯޓްކޮށްފައެވެ. ދެ ގަޑިއިރާއި 26 މިނެޓުގެ މިފިލްމްގެ ދެ ލަވަ މިހާރު ރިލީޒްކޮށްފައިވާއިރު ފިލްމަށް ވަނީ ގިނަ ފާޑުކިޔުންތަކެއް މިހާރު ވެސް އަމާޒުވެފައެވެ.
އަދިތުޔާ ޗޯޕްރާ ޕްރޮޑިއުސްކޮށްފައިވާ މި ފިލްމްގެ އޮފިޝަލް ޓްރެއިލާ މިމަހުގެ 10 ވަނަ ދުވަހުގެ ދައްކާލުމަށް ހަމަޖެހިފައިވާއިރު މިފިލްމްގެ ލީޑް އެކްޓަރުންގެ ގޮތުގައި ފެނިގެންދާނީ ޝާހްރުކް ހާނާއި ދީޕިކާ ޕަޑުކޯން އަދި ޖޯން އަބްރަހަމެވެ. ސިދާތު އާނަންދް ޑައިރެކްޓް ކޮށްފައިވާ މިފިލްމް ރިލީޒް ކުރުމަށް ހަމަޖެހިފައިވަނީ މިޖެނުއަރީ މަހުގެ 25 ވަނަ ދުވަހުއެވެ. އެހެންނަމަވެސް މިފިލްމްގެ ލަވަ "ބޭޝަރަމް ރަންގް"ގައި ފެނިގެންދާ ނިވާކަން ކުޑަ ހެދުންތަކާއި ގައިގޯޅި މަންޒަރުތަކުގެ ސަބަބުން ފިލްމް ބޮއިކަޓް ކުރުމަށް މިހާރުވެސް ބައެއް ފަރާތްތަކުން ދަނީ ގޮވާލަމުންނެވެ.
