ނިޒާމު ބަދަލުކޮށްގެން ވެރިކަމުގައި ދެމި ހުންނަން ބޭނުމެއް ނޫން: ރައީސް ޞާލިޙު
ވެރިކަމުގެ ތިންވަނަ ދައުރެއް ބޭނުންފުޅުނުވާ ކަމަށާއި، ވެރިކަމުގެ ނިޒާމު ބަދަލުކޮށް، މަޤާމުގައި ދެމި ހުންނަވަން ބޭނުންފުޅުނުވާ ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރޭ ހުޅުމާލޭގައި ބޭއްވި، އެމްޑީޕީގެ ރިޔާސީ ޕްރައިމަރީގެ ކެމްޕެއިން ހަރަކާތެއްގައި ވާހަކަފުޅުދައްކަވަމުން ރައީސް ވިދާޅުވީ ޤާނޫނު އަސާސީ ބަދަލުކޮށްގެން ވެރިކަމަށް އަންނަން އުޅެނީ ކާކުތޯ ބަލަންޖެހޭ ކަމަށެވެ.
އަދި، މިމަހުގެ 28 ގައި ބާއްވާ އެމްޑީޕީގެ ރިޔާސީ ޕްރައިމަރީގައި އެމަނިކުފާނާ ވާދަކުރައްވާ ރައީސް މުޙައްމަދު ނަޝީދަށް ވެރިކަން ނޫން އެއްޗެއް ނެތް ކަމަށްވެސް ވިދާޅުވެފައެވެ.
"ނިޒާމު ބަދަލުކޮށްގެން ވެސް، ޤާނޫނު އަސާސީ ބަދަލުކޮށްގެންވިޔަސް ވެރިކަމަށް އަންނަނީ ކޮން ބޭފުޅެއްކަން، ކާކުކަން ތި ހުރިހާ ބޭފުޅުންނަށް އެނގިވަަޑައިގަންނަވާނެ. ވަރަށް ސާފުކޮށް ފެންނަން ހުރި ކަންކަން މިއީ." ރައީސް ވިދާޅުވިއެވެ.
ރައީސް މިހެން ވިދާޅުވީ ޤާނޫނު އަސާސީ ބަދަލުކޮށްގެން ރިޔާސީ ތިންވަނަ ދައުރެއް ހޯއްދަވަން އެމަނިކުފާނު މަސައްކަތް ކުރައްވާ ކަމަށް ރައީސް ނަޝީދު ތުހުމަތު ކުރެއްވުމުންނެވެ.
ރައީސް އިތުރަށް ވިދާޅުވެފައިވަނީ ރިޔާސީ ނިޒާމެއްގައި އޮންނަނީ ދެ ދައުރު ކަަމަށާއި، ނިޒާމު ބަދަލުކުރައްވައިގެންވެސް އިތުރު ދައުރެއް ބޭނުންފުޅުވެނުލައްވާ ކަމަށެވެ.
ރައީސް ވިދާޅުވީ ވެރިކަމުގައި ދެމި ހުންނަވަން ބޭނުންފުޅުވަނީ ކާކުކަން އެންމެންނަށް އެނގޭ ކަމަށާއި، މިއީ ވޯޓުލާން ނުކުންނައިރު ވިސްނައިލާން ޖެހޭ ކަމެއް ކަަމަށެވެ.
