ނަޝީދުގެ ސަރުކާރުން އިގްތިސާދީ ދަތި ވަގުތުގައި މުއައްޒަފުން ވަކިކޮށް ހަރުމުދާ ވިއްކި:އަސްލަމް
2008 ވަނަ އަހަރު އުފެދުނު އެމްޑީޕީގެ ސަރުކާރުން ކުރީގެ ރައީސް ނަޝީދުގެ ވެރިކަމުގައި ކުރިމަތިވި އިގްތިސާދީ ދަތިވަގުތުގައި ގިނަ މުއައްޒަފުން ވަކިކޮށް ހަރުމުދާ ވިއްކިކަމަށް ވިދާޅުވެ އައްޑޫ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އެސިޔާސަތުތަކަށް ފާޑު ވިދާޅުވެއްޖެއެވެ.
މާދަމާ އޮންނަ އެމްޑީޕީގެ ރިޔާސީ ޕްރައިމަރީގެ ކެމްޕޭނުގައި ރައީސް އިބްރާޙިމް މުހައްމަދު ޞާލިހުގެ ބޭއްވެވި ބޮޑު ޖަލްސާގައި ވާހަކަދައްކަވަމުން އަސްލަމް ވިދާޅުވީ އެމްޑީޕީގެ ފުރަތަމަ ސަރުކާރުން ވެރިކަމާއި ހަވާލުވެ އެދުވަސްވަރު ކުރިމަތިވި ގްލޯބަލް ފައިނޭންސިއަލް ކްރައިސިސްގައި އަޅަންޖެހުނު ފިޔަވަޅުތަކަކީ އެއީ ކޮންޓެކްޓަރީ ފިސްކަލް ޕޮލިސީއެއްގެ ދަށުން އެޅި ފިޔަވަޅު ތަކެއްކަމަށެވެ.
"އަޅުގަނޑުމެން މުއައްޒަފުން ވަކިކުރީ މުސާރަ ދަށް ކުރީ އަދި އިދިކޮޅު ފަރާތްތަކުން އެބުނާހެން ހަރުމުދާ ވެސް ވިއްކަން ޖެހުނީ ދިރާގުގެ ހިއްސާ އެމްޑަބުލިއުއެސްސީގެ ހިއްސާ ވިއްކާ 25 އަހަރަށް އެއާޕޯޓްވެސް ކުއްޔަށް ދީ އެޑްވާންސް ވެސް ނަގަން ޖެހުނީ އަޅުގަނޑުމެން އެވަކީ ކުރި މުއައްޒަފުން އެތައް ދުވަހެއް ވަންދެން މަސައްކަތްކުރި މުއައްޒަފުން 17، 18 އަހަރު މަސައްކަތް ކުރި މުއައްޒަފުން 6500 މުއައްޒަފުން ވަކި ކުރަން މަޖުބޫރުވި" އަސްލަމް ވިދާޅުވިއެވެ.
އަސްލަމް ވިދާޅުވީ މިސާރުކާރާ ކުރިމަތިވީ އެއަށްވުރެ މާބޮޑު، މުޅި ދުނިޔެ ހުއްޓިގެން ދިޔަ އާލަމީ ވަބާއެއް ކަމަށާއި، އެހެންނަމަވެސް އެންމެ މީހަކުވެސް ވަޒީފާއިން ވަކި ނުކުރާކަމަށާއި، އެންމެ މީހެއްގެ މުސާރަވެސް ކުޑަ ކޮށްފައި ނުވާކަމަށެވެ. އަސްލަމް ވިދާޅުވީ ހުރިހާ ދިމާލަކުންވެސް ހަރުމުދާ ވިއްކުމަށާއި ހަރަދު ކުޑަކުރުމަށާއި ޕްރޮޖެކްޓްތައް ހުއްޓާލުމަށް ގޮވަމުން ދިޔަ ނަމަވެސް އެކަން ކޮށްފައިނުވާކަމަށެވެ.
"އެންމެ ހަރު މުދަލެއްވެސް ހަމަ ޔަގީނުންވެސް ވިއްކައެއް ނުލައްވާ. ހަރުމުދާ ވިއްކާވާހަކަ، ވިއްކާށޭ ވިއްކާށޭ، ޚަރަދު ކުޑަކުރާށޭ ޕްރޮޖެކްޓްތައް ހުއްޓާލާށޭ. އަޅުގަޑުމެންގެ ކަންފަތުގަ އަބަދުވެސް މަޖިލިސް ތެރެއިންނާއި ހުރިހާ ތަނަކުން އެކިއެކި ބޭފުޅުން" އަަަސްލަމް ފާހަގަކުރެއްވިއެވެ.
ރައީސް އިބްރާހިމް މުހައްމަދު ޞާލިހަށް ތައުރީފު ކުރައްވާ އަސްލަމް އިތުރަށް ވިދާޅުވީ އެއަށްވުރެ މާ ހަރުދަނާކޮށް މިސަރުކާރު ހިންގޭނެ ކަމަށާއި ލިބިފައި ހުރީ އެއަށްވުރެ މާ ކެތްތެރި ވިސްނުންތެރި ރައީސެއްކަމަށެވެ.
Ads by STO
