ވާދަވެރިކަން މި ނިމުނީ، ޕާޓީއާ އެކުގައި ކުރިއަށްދާން ތައްޔާރު: ރައީސް ޞާލިޙު
އެމްޑީޕީގެ ރިޔާސީ ޕްރައިމަރީ ނިމުމާއެކުގައި، އެ ޕާޓީގެ އެތެރޭގައި އޮތް ވާދަވެރިކަން ނިމުމަކަށް އައިސްފައިވާ ކަމަށާއި، ދެން އޮތީ އެކަތިގަނޑަކަށްވެ، އެކުގައި މަސައްކަތް ކުރުން ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މިއަދު ބޭއްވި ޕްރައިމަރީގައި، އެންމެ ގާތް މިތުރު އަދި އެމްޑީޕީގެ ރައީސް މުޙައްމަދު ނަޝީދުގެ މައްޗަށް ހޯއްދެވި ކާމިޔާބީ ފާހަގަކުރެއްވުމަށް ސަޕޯޓަރުންނާއެކު ބޭއްވި އެއްވުމުގައި ވާހަކަފުޅު ދައްކަވަމުން ރައީސް ވަނީ، މި އިންތިޚާބުގައި އެމަނިކުފާނާ ވާދަކުރެއްވި ފަރާތްތަކަށް މެސެޖެއް ދެއްވައިފައެވެ. އެމަނިކުފާނު އެދިވަޑައިގަތީ ވާދަވެރިކަން ދޫކުރައްވައި، މި އަހަރުގެ ސެޕްޓެމްބަރުމަހުގެ 9 ވަނަ ދުވަހު ބޭއްވުމަށް ހަަމަޖެހިފައިވާ ރިޔާސީ އިންތިޚާބަށް އެންމެން އެކުގައި ނުކުތުމަށެވެ.
"ވާދަވެރިންނަށް ގޮވާލަން ބޭނުންވަނީ، ވާދަވެރިކަން މިހާރު މި ނިމުނީއޭ. އެކަން މި ނިމުނީ. ދެން އޮތީ އަނެއްކާވެސް އެކަތިގަނޑެއްގެ ގޮތުގައި ކުރިއަށް އޮތް ރިޔާސީ އިންތިޚާބު، އެމްޑީޕީއަށް ކާމިޔާބު ކުރުން."
ރައީސް ވިދާޅުވީ ވާދަވެރި އިންތިޚާބެއްގައި ފެންނަން ބޭނުން ނުވާ އެތައް ކަމެއްވެސް ފެންނާނެ ކަމަށާއި، އެހެންނަމަވެސް އެއިން އެއްވެސް ކަމެއް މިހާރު ހިތްޕުޅުގައި ނެތް ކަމަށެވެ.
ރައީސް ވަނީ އެމްޑީޕީގެ އެންމެން އެކުގައި ނުކުމެ އެމްޑީޕީ ކުރިއަށް ގެންދިޔުމުގެ މަސައްކަތުގައި ބައިވެރިވާން ގޮވައިލައްވައިފައެވެ. ރައީސް ވިދާޅުވީ ޕްރައިމަރީގެ ކެމްޕެއިނުގައި ރާއްޖޭގެ ވަރަށް ގިނަ ރަށްތަކަށް ދަތުރުފުޅު ކުރެއްވުނު ކަމަށާއި، އެ މަނިކުފާނުގެ ތަޖުރިބާއަށް ބަލާއިރު، މި ނިމުނު ޕްރައިމަރީއަށްވުރެ މާ ފަސޭހަ ކަމާއެކުގައި ރިޔާސީ އިންތިޚާބު ކާމިޔާބު ކުރެއްވޭނެ ކަމަށް ޤަބޫލު ކުރައްވާ ކަމަށެވެ.
"އެއީ އަޅުގަނޑަކަށް ޝައްކެއް އޮތް ކަމެއް ނޫން. އެތެރޭގައި މި ހިނގީ، ވާދަވެރި މަސައްކަތަކަށް ވާތީ، އަޅުގަނޑުމެންނަށް ބައެއް ފަހަރު މަޑު ޖައްސާލަން ޖެހުނު. އެއީ އެކުވެރި، އެކީގައި އުޅެފައި، އެއް ވިސްނުމެއްގައި ތިބި ބަޔަކަށް ވާތީ. އެހެންނަމަވެސް، ދެން އޮތް މަރުހަލާގަ، އަޅުގަނޑުމެންނަށް މާ ފަސޭހަ ވާނެ."
ރައީސް ޞާލިޙު އިތުރަށް ވިދާޅުވީ އެމްޑީޕީ އަކީ އަބަދުވެސް އެއް ވިސްނުމެއްގައި ކުރިއަށްދާ ޕާޓީއެއް ކަމަށާއި، އެ ވިސްނުމަކީ ރާއްޖެއަށް ހަމަޖެހުމާއި ތަރައްޤީ ގެނެސް، ޙިޔާލުފާޅު ކުރުމުގެ މިނިވަންކަން ދިނުމުގެ ވިސްނުން ކަމަށެވެ. އެހެންކަމުން، އެމްޑީޕީގެ އެތެރޭގެ ވާދަވެރިކަން ނައްތާލައި، އެކުގައި މަސައްކަތްކޮށް، އިދިކޮޅު ބަލި ކުރެވޭނެ ކަމަށްވެސް ވިދާޅުވިއެވެ.
އެމްޑީޕީގެ ހަރަކާތްތައް މަޑު ޖެހި، ސަރުކާރަށް ދާންވީ ސްޕީޑުގައި ނުދެވުނީ، އެތެރޭގެ ވާދަވެރިކަން ބޮޑުވުމުން ކަމަށާއި، އެކަންކަން ހަނދާން ނައްތާލައްވައި، ޕާޓީއާއެކުގައި ކުރިއަށްދާން ތައްޔާރަށް ހުންނެވިކަންވެސް، ރައީސް މިރޭ ހާމަކުރެއްވިއެވެ.
