ފެނިގެން ދިޔައީ ރިޔާސީ އިންތިޚާބުގައި ހިންގާނެ ކޮރަޕްޝަންގެ ކުޑަ މިންވަރެއް: އުޝާމް

އިއްޔެ ނިމިގެންދިޔަ އެމްޑީޕީގެ ރިޔާސީ ޕްރައިމަރީގައި ފެނިގެން ދިޔައީ، މި އަހަރު އޮންނަ ރިޔާސީ އިންތިޚާބުގެ ނަތީޖާއަށް ނުފޫޒު ފޯރުވަން ސަރުކާރުން ހިންގާނެ ކޮރަޕްޝަނާއި ވައްކަމުގެ ކުޑަ މިންވަރެއް ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަޙުމަދު އުޝާމް ވިދާޅުވެއްޖެއެވެ.

Ads by MWSC

ރިޔާސީ އިންތިޚާބުގައި އެމްޑީޕީގެ ޓިކެޓުގައި ވާދަކުރާނެ ކެންޑިޑޭޓަކު އިންތިޚާބު ކުރުމަށް އިއްޔެ ބޭއްވި ފޯރިގަދަ ޕްރައިމަރީގައި ކާމިޔާބު ހޯދީ 61 އިންސައްތައިގެ އަގުލަބިއްޔަތަކާއިއެކު ރައީސް އިބްރާހިމް މުހައްމަދު ޞާލިހެވެ. ރައީސް މުޙައްމަދު ނަޝީދަށް ލިބިވަޑައިގެންނެވީ 39 އިންސައްތަ ވޯޓެވެ.

މި ޕްރައިމަރީއާއި ގުޅިގެން މެމްބަރު އުޝާމް ކުރެއްވި ޓުވީޓެއްގައި ވިދާޅުވީ ފެނިގެން ދިޔައީ ސަރުކާރުން ރިޔާސީ އިންތިހާބާއި ދިމާކޮށް ހިންގާނެ ވައްކަމާއި ކޮރަޕްޝަންގެ ކުޑަ މިންވަރެއް ކަމަށެވެ.

"އިންތިހާބުތަކާ ދިމާކޮށް ދައުލަތުގެ ފައިސާ ނަހަމަގޮތުގައި ބޭނުންކުރުން ހުއްޓުވުމަށް ގާނޫނުތައް ބަދަލުކުރަންޖެހޭ" އުޝާމް ވިދާޅުވި އެވެ.

އުޝާމް އިޝާރާތް ކުރައްވާފައި މިވަނީ ޕްރައިމަރީއާއި ދިމާކޮށް ސަރުކާރުން ގިނަ މަޝްރޫއުތަކެއް އިއުލާންކޮށް، އަނެއްބައި މަޝްރޫއުތައް އަވަސް އަރުވާލައިގެން ފެށުމުން އެކަމަށެވެ. ރައީސް ޞާލިހުގެ ވާދަވެރިން އެމްޑީޕީގެ އެތެރޭގައިވެސް މިވާހަކަ ދައްކަމުން ދިޔައެވެ.

މީގެ އިތުރުން ބައެއް ރަށްރަށުގެ ކެމްޕެއިން ހަރަކާތްތަކަށް ސަރުކާރު ކުންފުނިތަކުގެ މުވައްޒަފުންނާއި ވަސީލަތްތައް ފާޅުގައި ބޭނުންކުރަމުން ދިޔަތަން ފެނުނުއިރު ރައީސް ނަޝީދު ފެކްޝަންގެ ބޭފުޅުން ގެންދެވީ އެ ޝަކުވާ ކުރައްވަމުންނެވެ.

ބައެއް ދަތުރުތަކުގައި ކުންފުނިތަކުގެ އިސްވެރިން ރަށްރަށަށް ވަޑައިގެންނެވީވެސް އެކުންފުނިތަކުގެ އުޅަނދުގައެވެ.