ހެލެން ދެކެ ލޯބިވީކީނޫން އެއީ "އިމޯޝަނަލް އެކްސިޑެންޓެއް": ސާލިމް ހާން
ބޮލީވުޑްގެ ބާއިޖާންގެ ނަމުން މަޝްހޫރު ސަލްމާން ހާންގެ ބައްޕަ އަދި ވެޓަރަން ލިޔުންތެރިޔާ ސާލިމް ހާން އޭނާގެ ދެވަނަ އަނބިމީހާ ކަމުގައިވާ ހެލެން އާއި ކައިވެނި ކުރިގޮތާއި ބެހޭގޮތުން މީޑިޔާގައި އާ ވާހަކަތަކެއް ދައްކައިފިއެވެ.
ކާމިޔާބު ތިން ތަރިން ކަމުގައިވާ ސަލްމާން ހާން، އަރްބާޒް ހާން އަދި ސޮހައިލް ހާންގެ ބައްޕަ ސާލިމް ހާން އޭނާގެ ދެވަނަ އަނބި ހެލެން އާއި ކައިވެނި ކޮށްފައިވަނީ 1981 ވަނަ އަހަރުއެވެ. އޭރުވެސް އޭނާ އުޅެނީ އޭނާގެ 3 ދަރިންގެ މަންމަ ކަމުގައިވާ ސަލްމާ ހާން އާއި ކައިވެނިކޮށްގެންނެވެ. އޭނާ ހެލެން އާއި ކައިވެނިކޮށްފައިވަނީ ދެއަތްބަށެވެ.
ސާލިމް ހާން ބުނި ގޮތުގައި އޭނާ ހެލެން ދެކެ ލޯބިވީކީ ގަސްތަކުނޫނެވެ. އަދި ހެލަން ދެކެ ލޯބިވުމުގެ އެއްވެސް "އިންޓެންޝަނެއް" އޭނާގެ ނެތްނަމަވެސް ލޯބި ވެވުނީކަމަށާއި އެއީ "އިމޯޝަނަލް އެކްސިޑެންޓެއް" ކަމަށް އޭނާ ބުންޏެވެ.
"އޭނަވެސް ވަރަށް ޒުވާން އަހަރެންވެސް ވަރަށް ޒުވާން، ލޯބި ވުމުގެ އެއްވެސް "އިންޓެންޝަނެއް" އަހަރެންގެ ނެތް. މިއީ އިމޯޝަނަލް އެކްސިޑެންޓެއް ކޮންމެމީހަކަށްވެސް މިހެން ވެދާނެހަމަ" ބޮލީވުޑް ބަބުލް އިން ދައްކާ ޓޯކް ޝޯއެއްގައި ސާލިމް ބުންޏެވެ.
ކުޅަދާނަ ލިޔުންތެރިޔާ ސާލިމް ހާންވަނީ ޖާވިދް އަހްތަރް އާއެކު ގުޅިގެން ކާމިޔާބު ގިނަ ފިލްމްތަކެއްގެ ސްކްރިޕްޓް ލިޔެފައެވެ. މިގޮތުން "ދީވާރ"، "ޝޯލޭ" އަދި "ޔާދޯ ކީ ބަރާތު" ފަދަ ފިލްމްތަކަކަށް ސާލިމް ވަނީ ސްރިޕްޓް ލިޔެދީފައެވެ.
