މިއަދަކީ ޑިމޮކްރަސީގެ ހަޔާތުގައި ބަނަ ދުވަހެއް: އިދިކޮޅު
މިއަދަކީ ރާއްޖޭގެ ޑިމޮކްރަސީގެ ހަޔާތުގައި ބައްދަލު ކުރި ބަނަ ދުވަހެއްގެ ގޮތުގައި އިދިކޮޅުން ސިފަކޮށްފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ރައީސް އިބްރާހީމް މުޙައްމަދު ޞާލިޙު ރިޔާސީ ބަޔާން އިއްވެވިއިރު، އިދިކޮޅުން ވަނީ ބަޔާން ހުށަހެޅުމަށް ހުރަސް އަޅައި، އަޑު އުފުލައިފައެވެ.
އެގޮތުން އިދިކޮޅު ތިން މެމްބަރުން ކަމުގައިވާ މާވަށު ދާއިރާގެ މެމްބަރު މުޙައްމަދު ސަޢީދާއި، ނައިފަރު ދާއިރާގެ މެމްބަރު އަޙްމަދު ޝިޔާމްގެ އިތުރުން ފަރެސްމާތޮޑާ ދާއިރާގެ މެމްބަރު ހުސައިން މުޙައްމަދު ލަތީފުގެ ނަން އިއްވަވައި، ތަޅުމުން ވަނީ ބޭރުވެސް ކޮށްފައެވެ. އެއަށް ފަހު މަޖިލިސް މެދުކަނޑައިލައިފައި ދެން ފެށީ، އިދިކޮޅުގެ ތިން މެމްބަރުން ނުލައެވެ.
މަޖިލީހުގައި މިއަދު ހިނގައިދިޔަ ކަންތައްތަކާ ގުޅޭގޮތުން އިދިކޮޅުން ބޭއްވި ނޫސްވެރިންގެ ބައްދަލުވުމުގައި، އޭދަފުށި ދާއިރާގެ މެމްބަރު، އަދި މަޖިލީހުގެ މައިނޯރިޓީ ލީޑަރު އަޙްމަދު ސަލީމް ވިދާޅުވީ،އާދޭސް ކޮށްގެންވެސް އިދިކޮޅުގެ އެންމެ ތިން މެމްބަރުން މަޖިލީހަށް ނުވެއްދުމުން އެނގެނީ މި ސަރުކާރުގެ އެއްވެސް ޤާބިލު ކަމެއް ނެތްކަން ކަމަށެވެ.
"އެމްޑީޕީން އަބަދުވެސް ބުނަމުންދަނީ، ތިމަންނަމެންނަކީ ޑިމޮކްރަސީގެ އަނެކެއްޗެކޭ. އެހެންނަމަވެސް އަޅުގަނޑު ދަންނަވާނީ އެއީ ޑިމޮކްރަސީގެ ބައެއް ނޫނޭ."
މިއަދުގެ ނޫސްވެރިންގެ ބައްދަލުވުމުގައި ޕީއެންސީގެ ޕީޖީ ލީޑަރު، އަދި މަޑުއްވަރި ދާއިރާގެ މެމްބަރު އާދަމް ޝަރީފު އުމަރު ވިދާޅުވީ އިދިކޮޅު މެމްބަރުން މަޖިލީހުން ބޭރުކޮށް ރިޔާސީ ބަޔާން އިއްވެވުމަކީ ޤާނޫނު އަސާސީގެ ރޫހާ ޚިލާފަށް ކުރި ކަމެއް ކަމަށާއި، މިއަދަކީ ޑިމޮކްރަސީގެ ހަޔާތުގައި ބަނަ ދުވަހެއް ކަމަށެވެ.
އޭނާ ވިދާޅުވީ، މިއީ ޑިމޮކްރަސީގެ "ޓެގް" އަޅުވައިގެން ހިންގި ވަރަށް ފިނޑި އަަމަލެއް ކަމަށާއި، އިދިކޮޅުގެ އަޑު އެހުމުގެ ހިތްވަރު، ރައީސް ޞާލިޙުގެ ކިބައިގައި ނެތް ކަމަށެވެ.
ގުންޑާއިން ބޭރުކުރިދުވަސްް
ސަޅިދުވަހެއް