ގްރީން ޕާޓީ އަކީ ގްރާސް ރޫޓް ޑިމޮކްރަސީ: ޖާބިރު
"ގްރީން ޕާޓީ އޮފް މޯލްޑިވްސް" ގެ ނަމުގައި ޕާޓީއެއް އުފެއްދުމަށް ހުއްދަ ލިބުނީމަ އުފާކުރައްވާ ކަމަށާއި ގްރީން ޕާޓީއަކީ ގްރާސް ރޫޓް ޑިމޮކްރަސީ ކަމުގައި އެޕާޓީ އުފެއްދުމުގެ ހުއްދަދީފައިވާ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެވެ.
ޖާބިރު ވިދާޅުވީ އޭނާ އުފައްދަން މަސައްކަތް ކުރާ ގްރީން ޕާޓީ އަކީ "ޕީސް" އަށް ލޯބިކުރާނެކަމަށެވެ.
"ގްރީން ޕާޓީއެއް އަޅުގަނޑުމެން އުފައްދާ މިއަދު ރެޖިސްޓްރީ ލިބުނީމާއި އަޅުގަނޑުވަރަށް އުފާވޭ. ރާއްޖޭ ގްރީން ކޮށޭ އޮންނަންވާނީ ގްރީން ޓެކްނޮލޮޖީ އަންނަން އެބަ ޖެހެއޭ. ގްރީން ޕާޓީ އަކީ ގްރާސް ރޫޓް ޑިމޮކްރަސީއޭ. ގްރީން ޕާޓީ ޕީސް އަށް ލޯބިކުރާނޭ" ޖާބިރު ވިދާޅުވިއެވެ.
"ގްރީން ޕާޓީ އޮފް މޯލްޑިވްސް" ގެ ނަމުގައި ޕާޓީއެއް އުފެއްދުމަށް ޖާބިރަށް އިލެކްޝަން ކޮމިޝަނުން ހުއްދަ ދީފައިވަނީ މިމަހުގެ 13 ވަނަ ދުވަހުއެވެ.
ޕާޓީއެއް އުފެއްދުމަށް ޖާބިރަށް ހުއްދަ ދީފައި މިވަނީ އޭނާ އެންމެފަހުން ހުރި ޕާޓީ ކަމުގައިވާ ދިވެހި ރައްޔިތުންގެ ޑިމޮކްރެޓިކް ޕާޓީ (ޑީއާރުޕީ) އުވާލުމަށް އީސީ އިން ނިންމާފައިވަނިކޮށެވެ.
ޑީއާރުޕީގެ ލީޑަރޝިޕާއި ޖާބިރު ހަވާލުވެފައިވަނީ 2019 ވަނަ އަހަރުއެވެ. މެމްބަރުން ހަމަނުވެ ޕާޓީ އުވާލަން އީސީއިން ނިންމުމުން ޖާބިރުވަނީ އެމައްސަލަ ކޯޓަށް ހުށައަޅާފައެވެ. އެހެންނަމަވެސް އެމައްސަލަ ކޯޓުން ބަލައިގަނެފައެއް ނުވެއެވެ.
Ads by STO
