ވެރިކަމަށް އައުމަކީ އޭގެ ޒާތުގައި އަޅުގަނޑެއް އެހައި ޝައުޤުވެރި ވާކަމެއް ނޫން: ފާރިޝް
ހަޔާތުގައި ބޮޑުބައިގައި ބައްޕާފުޅު ވެރިކަން ކުރެއްވިތަން ފެނި އެކަން ތަޖުރިބާ ކުރެވުނުކަމަށާއި، ވެރިކަމަށް އައުމަކީ އޭގެ ޒާތުގައި އެހައި ޝައުޤުވެރިވާކަމެއް ނޫންކަމަށް އެމްއާރްއެމްގެ ރައީސް އަޚުމަދު ފާރިސް މައުމޫން ވިދާޅުވެއްޖެ އެވެ.
"ސޯޝަމް މޯ" އަށް ދެއްވި އިންޓަވިއުއެއްގައި ވިދާޅުވީ ވެރިކަން ކުރެއްވުމަކީ ފަސޭހަ ކަމެއް ނޫންކަމަށެވެ.
"ވެރިކަމަށް އައުމަކީ އޭގެ ޒާތުގައި އަޅުގަނޑެއް އެހާ ޝައުގުވެރިވާކަމެއް ނޫން ހަގީގަތުގައި. އޭގެ ހަގީގަތުގައި އަޅުގަނޑު ދުށިން އަޅުގަނޑުގެ ހަޔާތުގެ ބޮޑުބައިގައި އަޅުގަނޑު ބައްޕަ ރައީސުލްޖުމްހޫރިއްޔާގެ ޒިއްމާ އަދާކުރައްވަމުން ގެންދެވިތަން އެއީކީ ފަސޭހަކަމެއް ނޫން އިނގޭތޯ ބަޔަކު ވަރަށް އެކަން ކުރާހިތުން ނޫނީ އެކަން ކުރަން ޝައުގުހުރެގެން އެމަގާމުގެ ބޭނުންވެގެން މަސައްކަތްކުރާތަން ފެނުނީމަ އަޅުގަނޑަށް ހިތަށް އަރަ މިއީ ކިހާ ބޮޑު ޒިއްމާއެއްކަން. އަދި ކިހާ ބޮޑު މަސައްކަތެއްކަން ދިވެހި ރައްޔިތުންގެ އެތައް ލައްކަ މީހުންގެ މަސްލަހަތާއި އެމީހުންގެ ހެޔޮގޮތުގައި ދެމިތިބުމުގެ މަސްއޫލިޔަތާއި ޒިއްމާ ކޮނޑުގައި މިއަޅަނީ" ފާރިޝް ވިދާޅުވިއެވެ.
ފާރިޝް ވިދާޅުވީ ވެރިކަމަކީ އިނާމެއްގޮތަން ނޫނީ މެޑަލެއްގޮތަށް ހޯދާވަރުގެ ކަމެއް ނޫންކަމަށެވެ.
އެހެންނަމަވެސް ޤައުމުގެ މުސްތަގުބަލު ރަނގަޅުކުރުމަށްޓަކައި ކުރެވެން ހުރި ކަމެއް ކުރަންޖެހޭ ކަމަށް ފާރިޝް ވިދާޅުވިއެވެ.
ބޭފުޅުންނަށް ފުރުޞަތު ދެއްވުމަށް ފަހު ފަހަތަށް ޖެހެން ޖެހުނު ވަގުތަކުގައި ފަހަތަށް ވެސް ޖެހިވަޑައިގެންނެވީ ކަންވެސް ފާރިޝް ވަނީ ފާހަގަކުރައްވައިފައެވެ.
Ads by STO
