ރައީސް ނަޝީދުގެ ކެންޕެއިންގައި ނޫޅުއްވަން: މުނައްވަރު
މިދިޔަ ޖެނުއަރީ މަހުގައި އޮތް އެމްޑީޕީގެ ރިޔާސީ އިންތިޚާބުގައި ވާދަކުރެއްވި މަޖިލީހުގެ ރައީސް، ރައީސް މުޙައްމަދު ނަޝީދުގެ ޕްރައިމަރީ ކެންޕެއިންގައި ނޫޅުއްވާ ކަމަށް ރިޔާސީ އިންތިޚާބުގައި ވާދަކުރައްވާނެކަމަށް އިއުލާން ކުރައްވާފައިވާ ކުރީގެ ބަންޑާރަ ނައިބު ޑރ .މުޙައްމަދު މުނައްވަރު ވިދާޅުވެއްޖެއެވެ.
މުނައްވަރު މިހެން ވިދާޅުވީ، އިންތިޚާބުގައި އެމަނިކުފާނު ވާދަކުރައްވަނީ ރައީސް ނަޝީދު އަންގަވައިގެން އެމްޑީޕީގެ ވޯޓް ބައިބައި ކުރަން ކަމަށް ބައެއް ސިޔާސީ ފަރާތްތަކުން ތުހުމަތު ކުރަމުންދާތީ އެކަމާ ގުޅިގެން، މިއަދު ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުންނެވެ.
މުނައްވަރު ވިދާޅުވީ، ރައީސް ނަޝީދަކީ އަޅުގަނޑުގެ ގާތް ރަޙްމަތް ތެރިއެއް ކަމަށާއި، އެހެންނަމަވެސް މި އިންތިޚާބުގައި ކުރިމަތި ލުމަށްޓަކައި، ރައީސް ނަޝީދަކާ މަޝްވަރާއެއް ނުކުރައްވާ ކަމަށެވެ. ނަމަވެސް މިދިޔަ އަހަރު މެދަކާ ހަމައިގައި، އިންތިޚާބުގައި ކުރިމަތި ލައްވަން ޝައުޤުވެރިވާ ކަމަށް ވިދާޅުވި ކަމަށް މުނައްވަރު ވިދާޅުވިއެވެ.
ރައީސް ނަޝީދުގެ ޕްރައިމަރީ ކެންޕެއިންނަށް އައްޑު އަތޮޅަށް ކުރެއްވި ދަތުރުފުޅުގައި މުނައްވަރު ބައިވެރިވެ ވަޑައިގަތްކަމަށް ގިނަ މީޑިއާތަކުންވަނީ ރިޕޯޓްކޮށްފައެވެ. އެއީ، ރައީސް ނަޝީދާއެކު އައްޑުއަށް ވަޑައިގަންނަވާ ފޮޓޯއެއް މީސްމީޑިއާގައި އާއްމުވުމުންނެެވެ.
އެކަން ތަފްސީލްކޮށްދެއްވަމުން މުނައްވަރު ވިދާޅުވީ، ކެންޕެއިން ދަތުރުފުޅެއްގައި ބައިވެރިވެ ވަޑައިނުގަންވާ ކަމަށާއި ނަމަވެސް ރައީސް ނަޝީދު ދަތުރުފުޅު ކުރެއްވި ފްލައިޓުން ދަތުރުކުރެއްވުނު ކަމަށެވެ. އަދި ރައީސް ނަޝީދުގެ އެދިލެއްވުމަކަށް ފޮޓޯއެއް ނެންގެވި ކަމަށާއި އަދި ދެ ދުވަހެއްގެ ސައިގައި ބައިވެރިވި ކަމަށް ވިދާޅުވިއެވެ.
"ހެނދުނު ސަޔަށް، ހަވީރު ސަޔަށް ވަޑައިގެންނެވި، މިދެންނެވި ކަންކަން ފިޔަވާ އިތުުރު ކަމެއް، ނަޝީދުގެ ކެންޕެއިންގައި ރައީސް ނަޝީދާއެކު މަސައްކަތެއް ނުކުރަން" މުނައްވަރު ވިދާޅުވިއެވެ.
Ads by STO
