ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރުވެސް ޖޭޕީން ވަކިވެވަޑައިގެންފި
ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އާމިނަތު މުޙައްމަދު ސަލީމް (ސޯނީ) ޖުމްހޫރީ ޕާޓީން ވަކިވެވަޑައިގެންފިއެވެ.
ޖުމްހޫރީ ޕާޓީގެ ސެކްރެޓަރީ ޖެނެރަލް ޢަލީ އާރިފަށް ފޮނުއްވި ސިޓީއެއްގައި ސޯނީ ވިދާޅުވެފައިވަނީ ރައީސް އިބްރާހިމް މުޙައްމަދު ޞާލިޙުގެ ސަރުކާރަކީ މިހާތަނަށް ފެނުނު އެންމެ އަމާން އޮމާން ވެރިކަން ކަމަށެވެ.
އަދި ރާއްޖޭގެ ތާރީޚުގައި ވެސް ތައުލީމީ ގާބިލު ޖީލެއް ބިނާކުރުމަށް އެންމެ ގިނަ މަސައްކަތްތަކެއް ކުރި އަދި ކުރަމުންދާ ވެރިކަން ކަމަށާއި ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރެއްގެ ހައިސިއްޔަތުން ރައީސް ޞާލިޙުގެ ތައުލީމީ ސިޔާސަތު ތަންފީޒުކުރުމަކީ ލިބުނު ބޮޑު ފަޚުރަކާއި ޝަރަފެއް ކަމަށެވެ.
ސޯނީ ވިދާޅުވެފައިވަނީ އިތުރު ފަސް އަހަރު ރާއްޖޭގެ ވެރިކަމަށް ރައީސް ޞާލިޙް ގެނައުމަށް ތާއީދުކުރައްވާތީ އަދި އެކަމަށް މަސައްކަތް ކުރައްވަން ބޭނުންވެވަޑައިގަންނަވާތީ ޖޭޕީގެ މެންބަރުކަމުން މިއަދުން ފެށިގެން ވަކިވެވަޑައިގަންނަވަން ނިންމަވާފައިވާ ކަމަށެވެ.
އަދި މި ނިންމެވުން ނިންމެވީ ޖޭޕީން ރިޔާސީ އިންތިޚާބުގައި ވާދަކުރަން ނިންމުމާ ގުޅިގެން ކަމަށް ސޯނީ ވިދާޅުވިއެވެ.
ސޯނީ ޖޭޕީން ވަކިވެވަޑައިގެންގެންވިއިރު، އެމްޓީސީސީގެ ސީއީއޯ އާދަމް އާޒިމާއި، އެމްޑަބްލިޔުއެސްސީގެ އެމްޑީ ހަސަން ޝާހު ވެސް ވަނީ، ރައީސްއަށް ތާއީދު ކުރައްވަން ނިންމަވައި، ޖޭޕީން ވަކިވެވަޑައިގެންފައެވެ.
