ޑރ.އާސިމް ވެސް ރައީސް ޞާލިޙު ފަޅިއަށް
ޖެނީވާގައި ހުންނަ އ.ދ އޮފީހުގެ ރާއްޖޭގެ ދާއިމީ މަންދޫބު ޑރ. އާސިމް އަޙްމަދު ރިޔާސީ އިންތިޚާބުގައި ރައީސް އިބްރާހިމް މުޙައްމަދު ޞާލިޙަށް ތާޢީދު ކުރެއްވުމަށް ނިންމަވައިފިއެވެ.
ރައީސް އިބްރާހިމް މުޙައްމަދު ޞާލިޙަށް ތާޢީދު ކުރައްވާކަން ހާމަ ކުރައްވައި، ޑރ. އާސިމް ކުރެއްވި ޓްވީޓެއްގައި ވިދާޅުވީ، ރައީސްގެ ޒަޢާމަތުގައި ރާއްޖެއަށް ތަރައްޤީ އާއި ކުރިއެރުމާއި އިޖުތިމާޢީ ހަމަޖެހުން ގެނެސްދެއްވާފައިވާ ކަމަށެވެ.
އެހެންކަމުން އެކަންކަން ދެމެހެއްޓުމަށްޓަކައި ކުރިއަށް އޮތް ރިޔާސީ އިންތިޚާބުގައި ރައީސް ޞާލިޙަށް ތާއީދު ކުރަން ނިންމާފައިވާކަމަށް ޑރ. އާސިމް ވިދާޅުވިއެވެ.
އާސިމަކީ އ.ދގެ އިންސާނީ ހައްގުތަކާ ބެހޭ ކައުންސިލުގެ ނައިބު ރައީސް ކަމުގެ މަޤާމުވެސް އަދާކުރައްވަމުން ގެންދަވާ ބޭފުޅެކެވެ.
ޑރ. އާސިމް ރައީސް ޞާލިޙަށް ތާޢީދު ކުރަށްވަން ނިންމަވާފައިވާއިރު އޭނާ އަކީ ޖުމްހޫރީ ޕާޓީގެ މެންބަރެކެވެ.
ޖޭޕީން ރިޔާސީ އިންތިޚާބުގައި ވާދަ ކުރަން ނިންމުމާއެކުގައި، ސިޔާސީ މަޤާމުތަކުގައި ތިއްބެވި އެ ޕާޓީގެ ގިނަ މެމްބަރުން ގެންދަވަނީ، މަޤާމުން އިސްތިއުފާ ދެއްވަމުންނެވެ.
Ads by STO
