ރާއްޖެ މިހާރު ފެންނަނީ ވަކި ގައުމެއްގެ "އުނގަށް" ވެއްޓިފައިވާތަން: ނާޒިމް
ރާއްޖެ މިހާރު ފެންނަނީ ވަކި ގައުމެއްގެ "އުނގަށް" ވެއްޓިފައިވާތަން ކަމަށް މޯލްޑިވްސް ނޭޝަނަލް ޕާޓީގެ ލީޑަރ ކާނަލް މުހައްމަދު ނާޒިމް ވިދާޅުވެއްޖެއެވެ.
އެމް.އެން.ޕީ އިން ބާއްވާ "ނުއިވޭ އަޑުތައް" ސިލްސިލާގެ 2 ވަނަ އެޕިސޯޑްގައި ވާހަކަދައްކަވަމުން ރޭ ނާޒިމް ވަނީ މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ. މިގޮތުން ނާޒިމް ވިދާޅުވީ ޤައުމު ހިންގުމުގެ ޙާލަތު މި ވަގުތު މި އޮތީ ރަނގަޅުގޮތަކަށް ނޫން ކަމުގައެވެ. އެގޮތުން ރާއްޖޭގެ ޚާރިޖީ ސިޔާސަތާ، ދިފާއީ އަދި އިޤްތިޞާދީ ސިޔާސަތުގައި ހުރި ބޮޑެތި މައްސަލަތަކާމެދު ފާޑުވިދާޅުވެ ވާހަކަދެއްކެވިއެވެ.
ރާއްޖޭގެ ޚާރިޖީ ވަޒީރަކަށް މިއަދު ހުންނެވީ އެހެން ޤައުމަކަށް ރާއްޖެ ހިފިދާނެ ކަމަށް ވިދާޅުވެފައިވާ ބޭފުޅެއްކަން ފާހަގަކުރައްވައި، ނާޒިމް ވިދާޅުވީ މިފަދަ ވާހަކަފުޅެއް ވިދާޅުވެފައިވާ ބޭފުޅަކު އެ މަޤާމުގައި ހުންނަވައިގެން ޚާރިޖީ ގޮތުން ރާއްޖޭގެ ސަލާމަތް ކަށަވަރުކުރެއްވޭނެކަމަށް ދެކެވަޑައިނުގަންނަވާކަމުގައި ނާޒިމް ވިދާޅުވިއެވެ.
ރާއްޖޭގެ ވިޔަފާރިއާ އިޤްތިޞާދުވެސް މިއަދު ވަނީ ހަމަ އެގޮތަށް އެއް ޤައުމެއްގެ އަތްދަށަށް ގޮސްފައިކަމަށްވެސް ނާޒިމް ވިދާޅުވިއެވެ. އެގޮތުން، އަސާސީ ކާޑުގެ ތަކެތި ލިބެނީ ހަމައެކަނި އެއްމެ ޤައުމަކުން ކަމަށް ހަމަޖެހިފައި އޮތުމަކީ ނުރަނގަޅު ކަމެއް ކަން ނާޒިމް ފާހަގަކުރެއްވިއެވެ.
މިފަދަ ހުރިހާ ސިޔާސަތެއްގައި މިއަދު މި އޮތް ސަރުކާރުގެ ބާރެއް ނެތްކަން ނާޒިމް ސިފަކުރެއްވިއެވެ. އަދި އެ ސިޔާސަތުތައް ބައްޓަންވެގެން އަންނަނީ އެހެން ޤައުމަކުން އެދޭ ގޮތަށް ކަމަށް ވާތީ، ރާއްޖޭގެ ސަލާމަތާ ރައްކާތެރިކަން ބިރުވެރިކަމަށް ހުށަހެޅިފައިވާކަން ނާޒިމްގެ ވާހަކައިން ސާފުކޮށްދެއްވިއެވެ.
.
