އިތުރު ކަނބަލުން ޖޭޕީއާ ގުޅިއްޖެ
ިރިޔާސީ އިންތިޚާބާ ދިމާކޮށް، ސަރުކާރު ކޯލިޝަނުގައި ހިމެނޭ ޖުމްހޫރީ ޕާޓީއަށް ގިނަ އަދަދެއްގެ ޒުވާން ކަނބަލުން ގުޅިއްޖެއެވެ.
މި އަހަރުގެ ސެޕްޓެމްބަރުމަހުގެ ނުވަ ވަނަ ދުވަހު ބާއްވާ ރިޔާސީ އިންތިޚާބުގައި ވަކިން ވާދަ ކުރަން ޖޭޕީން ނިންމައިފައިވާއިރު، އެ ޕާޓީން ދަނީ ހަރަކާތްތައް ފުޅާކޮށް، މެމްބަރުން އިތުރު ކުރުމަށް މަސައްކަތް ކުރަމުންނެވެ.
ޖުމްހޫރީ ޕާޓީގެ އަންހެންގެ ލީގަށް ޚާއްސަކޮށް ރޭ ބޭއްވި ތަރާވީހުގައި، އެ ޕާޓީއާ އަލަށް ގުޅުނު ކަނބަލުންގެ ފޯމުތަކާއި ހަވާލުވެވަޑައިގެންނެވީ، ޕާޓީގެ ނައިބް ލީޑަރު އަދި ޓްރާސްޕޯޓް މިނިސްޓަރު ޢާއިޝަތު ނަހުލާއެވެ. ޖޭޕީގެ މައި ޖަގަހަ މ.ކުނޫޒްގައި އޮތް މިރަސްމިއްޔާތުގައި ގިނަ އަދަދެއްގެ ޒުވާން ކަނބަލުން ވަނީ ޖޭޕީއާއި ގުޅިފައެވެ.
ޖޭޕީން ރިޔާސީ ރޭހަށް ނުކުންނަވަނީ، އެ ޕާޓީގެ ލީޑަރު ޤާސިމް އިބްރާހީމެވެ. ޤާސިމް އިންތިޚާބުގައި ވާދަ ކުރަން ނިންމެވުމާއެކު، ސިޔާސީ މަޤާމުތަކުގައި ތިއްބެވި އެ ޕާޓީގެ ބައެއް މެމްބަރުން ވަކިވެސް ވެފައިވެއެވެ.
ޖޭޕީން ވަނީ އެ ޕާޓީގެ ހަރަކާތްތައް އަތޮޅުތެރޭގައި ފުޅާކުރުމުގެ ގޮތުން ދާއިރާތަކުގެ ރައީސުުން ހޮވުމަށް ވެސް ނިންމާފައެވެ. ދާއިރާތަކުގެ ރައީސުންނަށް ވާން ބޭނުންވާ ފަރާތްތަކަށް 50 މީހުންގެ ސޮއި ހުށަހަޅަން ޖެހޭއިރު، ރައީސުންގެ ގޮތުގައި ކުރިމަތިލާން އެދޭ ފަރާތްތަކަށް މި މަހުގެ 20 ވަނަ ދުވަހުގެ 15:00 އާ ހަމައަށް ވަނީ ފުރުސަތު ހުޅުވައިލައިފައެވެ.
