ކޮރޯނާ ވައިރަސް ވެކްސިން: އިނގިރޭސިވިލާތުން އިތުރަށް 90 މިލިއަން ޑޯޒް ގަންނަނީ
ފެތުރެމުން އަންނަ ކޮވިޑް-19 އިން ރައްކާތެރިވުމަށްޓަކައި އުފައްދާ ވެކްސިންގެ 90 މިލިއަން ޑޯޒް އިތުރަށް ގަތުމަށް އިނގިރޭސިވިލާތުން ޑީލް ހަދައިފިއެވެ.
ރިޕޯޓުތަކުން ބުނެފައިވާ ގޮތުގައި އިނގިރޭސިވިލާތުން ގަންނަން ޑީލް ހަދާފައިވަނީ ބެލްޖިއަމްގެ ބޭސްއުފައްދާ ކުންފުންޏެއް ކަމަށްވާ ޖޭންސަން އިންނާއި އެމެރިކާގެ ބަޔޮޓެކް ކުންފުންޏެއް ކަމަށްވާ ނޯވާވެކްސް އާއެވެ.
އޭގެ މާނައަކީ މިހާރު މިވެކްސިން އުފައްދާ ކުންފުނިތަކުގެ ތެރެއިން 6 ކުންފުންޏަކުން ވެކްސިން ހޯދުމަށް އިނގިރޭސިވިލާތުން ނިންމާފައިވާ ކަމެވެ. އެގޮތުން މިހާރުވެސް 340 މިލިއަން ޑޯޒް އެޤައުމަށް ލިބުމަށްވަނީ ހަމަޖެހިފައެވެ.
އެއަދަދުތަކަށް ބަލާއިރު އިނގިރޭސިވިލާތުގެ ކޮންމެ ރައްޔިތަކަށް ކޮރޯނާ ވައިރަހުން ރައްކާތެރިވުމުގެ ފަސް ޑޯޒް ލިބޭވަރު ވާނެއެވެ.
އެކި ޤައުމުތަކުން އުފައްދަމުން އަންނަ ކޮރާނާ ވައިރަސް ވެކްސިންގެ ތެރެއިން ގިނަ އަދަދެއްގެ ވެކްސިން ނާކާމިޔާބު ވެސް ވެދާނެތީ، އިނގިރޭސިވިލާތުން އަންނަނީ ރައްކާތެރިވުމުގެ ގޮތުންނާއި އޭގެތެރެއިން ކޮންމެވެސް އެއް ވެކްސިނެއް ރަނގަޅަށް މަސައްކަތް ކުރާނެކަމުގެ އުންމީދުގައި، ގިނަ އަދަދެއްގެ ވެކްސިން ލިބޭނެ ގޮތް ހަދަމުންނެވެ.
އިނގިރޭސިވިލާތުން ގިނަ އަދަދެއްގެ ވެކްސިން ގަތުމަށް މަސައްކަތް ކުރަމުން އަންނައިރު، ވެކްސިން ގަތުމަށް ޚަރަދު ކޮށްފައިވަނީ ސީދާ ކިހާވަރެއްކަން ހާމަ ކޮށްފައެއް ނުވެއެވެ.
އިނގިރޭސިވިލާތުގެ ވެކްސިން ޓާސްކްފޯހުގެ ޗެއާޕަރސަން ކޭޓް ބިންގަމް ބުނީ މީގެން އެއްވެސް ވެކްސިނެއް ރަނގަޅަށް މަސައްކަތް ކުރާނެ ކަމުގެ ޔަގީންކަމެއް އަދި ދެވެން ނެތް ކަމަށެވެ.
"ނަމަވެސް ހައި ރިސްކު މީހުންނަށް ވެސް މިވެކްސިން ބޭނުންވާތީ، ވެކްސިން ކުރީބައިގައި ހޯދާފައި ބެހެއްޓުމަށް އިސްކަންދިނީ" ކޭޓް ބުންޏެވެ.
