ގައިދީއަކަށް މަހަކު 20،000ރ. ދައުލަތުން ހަރަދުކުރޭ
ގައިދީއަކަށް މަހަކު 20،000 ރުފިޔާ ދައުލަތުން ހަރަދުކުރާ ކަމަށް ކޮމިޝަރ އޮފް ޕްރިޒަންސް އަޙްމަދު މުޙައްމަދު ފުޅު ވިދާޅުވެއްޖެއެވެ.
ޕްރިޒަން އޮފިސަރުންގެ އަސާސީ ތަމްރީން ޕްރޮގްރާމްގެ 27 ވަނަ ބެޗްގެ ދަސްވެނިވުމުގެ ރަސްމިއްޔާތުގައި ވާހަކަދައްކަމުން އަހުމަދު ވިދާޅުވީ އެވެރޭޖްކޮށް ކޮންމެ މަހަކު 64 މީހުން މޯލްޑިވްސް ކަރެކްޝަނަލް ސަރވިސް (އެމްސީއެސް) ގެ ބެލުމުގެ ދަށަށް އަންނައިރު، ޖަލުން އެކި ސަބަބުތަކަށް ދޫކޮށްލަންޖެހެނީ ނިސްބަތުން 45 މީހުން ކަމަށެވެ.
ފާއިތުވި އަހަރުގެ ބަޖެޓަށް ބަލާއިރު، 20،000 ރުފިޔާ ނިސްބަތުން މީހެއްގެ ބޮލަށް ހޭދަކުރަން ޖެހުނު ކަމަށާއި އެހެން ކަމުން ދިވެހި ދައުލަތުން ކުރަމުންދާ ބޮޑު ހޭދަ އާއި މިކަމުން ހާޞިލްކުރަންޖެހޭ ބޮޑު ނަތީޖާ އާއި ހެޔޮ ބަދަލު ދައްކަދޭން ޖެހޭކަމުގައި އަހުމަދު ވިދާޅުވި އެވެ.
ޖަލުގައި ހިންގުނު ޑްރަގް ރިހެބިލިޓޭޝަން ޕްރޮގްރާމަށް އަލިއަޅުއްވާލައްވަމުން ކޮމިޝަނަރ ވިދާޅުވީ އެފަދަ ޕްރޮގްރާމެއް ހިންގުމަށް ދަސްވެފައިވާއިރު، އެ ޕްރޮގްރާމް ފުރިހަމަ ކުރާ ފަރާތްތައް ޖަލުން ނެރުމުން ކުރިމަތިވާ ގޮންޖެހުންތަކަށް އަހުލުވެރިވާންޖެހޭ ކަމަށެވެ. މިގޮތުން ފުރަތަމަ ފްރޮގްރާމްގެ ދަށުން މުޖްތަމަޢުއަށް ދޫކުރި 32 މީހުންގެ ތެރެއިން 10 މީހުންގެ މައްސަލަތައް އުޅެ ފަސް މީހުން އަނބުރާ ޖަލަށް އައިސްފާވާއިރު، 22 މީހުން ކާމިޔާބުކަމާއެކު މުޖްތަމަޢުގައި އުޅެމުންދާކަން ކޮމިޝަނަރ ފާހަގަކުރެއްވި އެވެ.
މިދިޔަ އަހަރު ޓްރަޔަލް އަކަށް ބޭނުންކުރަން ފެށި ބޮޑީ ވޯން ކެމެރާތައް ދާދި އަވަހަށް އޮފިސަރުން ރަސްމީކޮށް ބޭނުންކުރަން ފަށާނެކަމަށާއި އޭގެ ސަބަބުން ޖަލުގައި ބަންދުކޮށްފައިތިބި ފަރާތްތަކާއި އޮފިސަރުންގެ ރައްކާތެރިކަން ކަށަވަރުވެ، ޖަވާބުދާރީވާންޖެހޭ އިދާރާތަކަށް ޖަވާބުދާރީ ވުމުގައި އިތުރު ލުއި ފަސޭހަތަކެއް ލިބިގެންދާނެކަމަށް ކޮމިޝަނަރ ވިދާޅުވި އެވެ. އަދި ޒަމާނީ ވަޞީލަތްތަކާއެކު އެމްސީއެސްގެ މަސައްކަތްތައް އިތުރަށް ހަރުދަނާ ކުރެވިގެންދާކަމަށާއި އެއާއެކު ކުރިއަށް އޮތް ތަނުގައި ކަނޑައަޅާފައިވާ ލަނޑުދަނޑިތައް ހާޞިލްކުރެވިގެން ދިއުމުން ވަރަށް ގިނަ ކަންތައްތަކަށް ހައްލު ލިބިގެންދާނެ ކަމަށްވެސް ވިދާޅުވި އެވެ.
