އިމުގެ މައްސަލައާއި ރައީސްގެ ސިޓީފުޅާއި ގުޅުމެއްނެތް ނަމަ ކީއްވެތޯ ފޮރުވައިގެން ތިއުޅުއްވަނީ؟: އުޝާމް
ދެކުނުގެ އިން ވަކި ކުރުމުގެ މައްސަލައާއި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މޮރިޝަސް އަށް ފޮނުއްވި ސިޓީފުޅާއި ގުޅުމެއް ނެތްނަމަ އެސިޓީފުޅު ފޮރުވައިގެން ސަރުކާރުން މިއުޅުއްވަނީ ކީއްވެތޯ އައްސަވައި ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަޙމަދު އުޝާމް ސުވާލު އުފައްދަވައިފިއެވެ.
އުޝާމް ވިދާޅުވީ އިން ވަކިކުރުމުގެ މައްސަލާގައި ދިވެހި ސަރުކާރުގެ ސްޓޭންޑް ބަދަލުވީ އެސިޓީފުޅާއި ގުޅިގެންކަމަށެވެ.
"ދެން ކީއްވެގެންތޯ އެހާވަރަކުން ތިޔަ ސިޓީއެއް ފޮރުވައިގެން ސަރުކާރުން މިއުޅެނީ؟ މިމައްސަލައާ ގުޅޭ ހުރިހާ ލިޔެކިއުމެއް މަޖިލީހާ ހިއްސާކޮށްފައިވާކަމަށް ބުނާއިރު، އެލިޔުންތަކުގެ ތެރޭގައި މިސިޓީއެއް ނެތް. އިންވަކިކުރުމުގެ މައްސަލާގައި ދިވެހި ސަރުކާރުގެ ސްޓޭންޑް ބަދަލުވީ ތިޔަ ސިޓީއާ ގުޅިގެން." ސިޓީ ފުޅާއި ގުޅޭގޮތުން އުޝާމް ވިދާޅުވިއެވެ.
އުޝާމް މިހެން ވިދާޅުވީ ރާއްޖެ އާއި މޮރިޝަސްއާ ދެމެދު ކަނޑުގެ ސަރަހައްދުން ފުށު އަރާ ސަރަހައްދުގެ އިން ވަކި ކުރުމުގެ މައްސަލައާ މޮރިޝަސްގެ ބޮޑުވަޒީރަށް ރައީސް އިބްރާހިމް މުހައްމަދު ސޯލިހު ފޮނުއްވި ސިޓީއާ އެއްވެސް ގުޅުމެއް ނެތް ކަމަށް ބަންޑާރަ ނައިބު އިބްރާހިމް ރިފްޢަތު އިއްޔެ ވިދާޅުވުމާއި ގުޅިގެންނެވެ.
މި މައްސަލައިގައި ރިފްޢަތުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހުގައި މިހާރު ގެންދަނީ ކުރިއަށެވެ.
