ރޭގެ ޖަލްސާ ކާމިޔާބު, ރިޔާސީ އިންތިޚާބު ޖޭޕީން ކާމިޔާބު ކުރާނީ ފުރިހަމަ އަޤުލަބިއްޔަތާއެކު: އިލްހާމް
ޖޭޕީގެ ލީޑަރު ޤާސިމް އިބްރާހިމަށް ރިޔާސީ ޓިކެޓް އެރުވުމަށް ބޭއްވި ރަސްމިއްޔާތު ނިމުނީ ވަރަށް ކާމިޔާބުކަމާއެކު ކަމަށާއި ސެޕްޓެމްބަރު މަހު އޮންނަ ރިޔާސީ އިންތިޚާބު ޖުމްހޫރީ ޕާޓީއިން ކާމިޔާބު ކުރާނީ ރައްޔިތުންގެ ފުރިހަމަ ތާއީދާއި، ފުރިހަމަ އަޣުލަބިއްޔަތަކުން ކަމުގައި ޖޭޕީގެ ރިޔާސީ ކެނޑިޑޭޓް ޤާސިމްގެ ސްޕެޝަލް އެންވޯއި އިލްހާމް އަހުމަދު ވިދާޅުވެއްޖެއެވެ.
އިލްހާމް މިހެން ވިދާޅުވީ ޖުމްހޫރީ ޕާޓީގެ ރިޔާސީ ކެންޑިޑޭޓް އޮނަރަބަލް ޤާސިމް އިބްރާހިމަށް ރިޔާސީ ޓިކެޓު އެރުވުމަށާއި ކެމްޕެއިން ލޯންޗުކުރުމަށް ބޭއްވުނު ރަސްމިއްޔާތު ކާމިޔާބު ކަމާއިއެކު ނިންމާލެވިފައިވާކަން ފާހަގަކުރައްވައި އެބައްދަލުވުމަށް ވަޑައިގެންނެވި މީހުންނަށް ޝުކުރު ދަންނަވައި ކުރެއްވި ޓުވީޓެއްގައެވެ.
އިލްހާމް ވަނީ ޖުމްހޫރީ ޕާޓީގެ ރިޔާސީ ޓިކެޓް، ޖުމްހޫރީ ޕާޓީގެ ރިޔާސީ ކެންޑިޑޭޓް އޮނަރަބަލް ޤާސިމް އިބްރާހިމަށް ވަރަށް ހޫނު މަރުހަބާއެއް ދަންނަވާފައެވެ. އަދި ރޭގެ ރަސްމިއްޔާތަށް ވަޑައިގެންނެވި އެންމެހައި ބޭފުޅުންނަށް އޭނާގެ އަމިއްލަ ނަމުގައާއި ޖުމްހޫރީ ޕާޓީގެ ނަމުގައި ވަރަށް ބޮޑަށް ޝުކުރު ދަންނަވާފައެވެ.
ﷲގެ ހެޔޮ ރަޙުމަތާއެކު މިއަހަރުގެ ރިޔާސީ އިންތިޚާބު ޖުމްހޫރީ ޕާޓީ އިން ކާމިޔާބު ކުރާނީ ރައްޔިތުންގެ ފުރިހަމަ ތާއީދާއި، ފުރިހަމަ އަޣުލަބިއްޔަތަކުން. ޖުމްހޫރީ ޕާޓީއާއި ޖުމްހޫރީ ޕާޓީގެ ލީޑަރަކީ ވަކި ކުލައަކަށް، ވަކި ފިކުރަކަށް، ވަކި ވިސްނުމަކަށް، ވަކި ޕާޓީއެއް ބެލުމެއްނެތި އެންމެންނަށް ފުރުޞަތުދޭނެ ޕާޓީއެއް." އިލްހާމް ވިދާޅުވިއެވެ.
މީގެއިތުރުން އިލްހާމް ވިދާޅުވީ ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް ވެވަޑައިގަންނަވާ ވައުދުތަކަކީ އަކުރުން އަކުރަށް ފުރިހަމަ ކުރެވިގެންދާނެ ވައުދުތަކެއް ކަމަށެވެ.
ރޭގެ ޖަލްސާ ކާމިޔާބުކަމާއެކު ނިންމާލެވުނުކަމަށް އިލްހާމް ވިދާޅުވިއިރު ޖަލްސާގައި ބައިވެރިވި މީހުންގެ އަދަދު މަދުކަމަށްބުނެ އެކި ފަރާތްތަކުން އަންނަނީ ސޯޝަލްމީޑިއާގައި ފާޑުކިޔަމުންނެވެ.
