ރިޔާސަތު ބަލަހައްޓަވަން އުޒުރުވެރިވާކަމަށް ރައީސް ނަޝީދު އަންގަވައިފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މަޖިލީހުގެ ރިޔާސަތު ބަލަހައްޓަވަން އުޒުރުވެރިވާކަމަށް މިއަދު އަންގަވައިފި އެވެ.
އެމަނިކުފާނު މިފަދައިން އަންގަވާފައިވަނީ ސަރުކާރު ހިންގާ މައި ޕާޓީ، އެމްޑީޕީން ރައީސް ނަޝީދުގެ އިތުބާރު ނެތްކަމުގެ މައްސަލައެއް މަޖިލީހަށް ވައްދާފައިވާތީ އެމައްސަލައިގައި ގޮތެއް ނިންމުމުގެ ކުރިން ރިޔާސަތު ބެލެހެއްޓެވިދާނެކަމަށް ގަބޫލުފުޅު ނުކުރެއްވޭތީ އެވެ. މަޖިލީހުގެ އަމީން އާންމު ފާތިމަތު ނިއުޝާއަށް ނަޝީދު ފޮނުއްވި ސިޓީގައި ވިދާޅުވީ މަޖިލީހުގެ ގަވާއިދުގެ 44 ވަނަ މާއްދާގެ ހ. ގެ ދަށުން އެމަނިކުފާނަށް އެ އިހުތިޔާރު ލިބިވަޑައިގަންނަވާކަމަށެވެ.
ރައްޔިތުންގެ މަޖިލީހަށް އެމްޑީޕީން ވަނީ މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލައެއްވެސް ވައްދައިފަ އެވެ. މިމައްސަލައިގައި ވޯޓު ނަގާއިރު މަޖިލީހުގެ ރިޔާސަތު ބަލަހައްޓަވަން ޖެހިވަޑައިގަންނަވާނީ މަޖިލީހުގެ ރައީސަށްކަމަށް ގަވާއިދު ބުނެ އެވެ. އެހެންކަމުން ރައީސް ނަޝީދު އުޒުރުވެރިވެވަޑައިގަންނަވާނަމަ ދެން ރިޔާސަތު ބަލަހައްޓަވާނެ ބޭފުޅަކު ކަނޑައަޅަން ޖެހޭނީ އެމަނިކުފާނަށެވެ.
ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގައި ބުނެފައި ވަނީ މަޖިލީހުގެ ރައީސް އާއި މަޖިލީހުގެ ނައިބު ރައީސް ރިޔާސަތު ބެލެހެއްޓުން އުޒުރުވެރިވެއްޖެ ހާލަތެއްގައި، ރިޔާސަތު ބަލަހައްޓާނެ މެމްބަރުން ގާނޫނު އަސާސީގެ 82 ވަނަ މާއްދާގެ ށ. ގައިވާ ގޮތުގެ މަތިން މަޖިލީހުގެ ރައީސް ކަނޑައަޅަންވާނެ ކަމަށެވެ.
މަޖިލީހުގެ ގަވާއިދު އޮތް ގޮތުން ރައީސާއި ނައިބު ރައީސްގެ މައްސަލަ އެއްކޮށް މަޖިލީހަށް ވައްދައިފިނަމަ މަޖިލީހުގައި މަރު ތަޅު އެޅުވޭނެކަމަށް މީގެ ކުރިން އީވާ ވަނީ ވިދާޅުވެފަ އެވެ. އަދި ދެމައްސަލަ އެއްފަހަރާ މަޖިލީހަށް ވެއްްދީ އެމްޑީޕީން ރާވައިގެން ކަމަށް އޭނާ ވިދާޅުވި އެވެ.
އީވާ ވިދާޅުވި ގޮތުގައި މަޖިލީހުގައި މަރު ތަޅު އެޅުވީ ރިޔާސީ އިންތިހާބަށް ތިން މަސް ދުވަހަށް ވެފައިވާތީ ސަރުކާރުން ހިންގާ ކޮރަޕްޝަނުގެ ވާހަކަ މަޖިލީހުގައި ދައްކައި އެކަމަށް ފާރަވެރިވެދާނެތީ އެކަން ހުއްޓުވުމަށެވެ.
ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވެއްދީ 54 މެމްބަރުންގެ ސޮޔާއިއެކު އެވެ. އޭގެ ތެރޭގައި އެމްޑީޕީގެ މެމްބަރުންގެ އިތުރުން އެމްޑީއޭ އާއި އަމިއްލަ ބައެއް މެމްބަރުންވެސް ހިމެނެ އެވެ. މިމައްސަލައިގައި އެމްޑީޕީގެ ހަތަރު މެމްބަރަކު ސޮއި ނުކުރެ އެވެ.
