އައްޑޫގެ ވިޔަފާރިތަކަށް ޓެކްސް ލުއިކޮށްދެނީ
އައްޑޫގެ ވިޔަފާރިތަކަށް ޓެކްސް ލުއިކޮށްދިނުމުގެ މަސައްކަތް ސަރުކާރުން ކުރަމުން އަންނަ ކަމަށް ރައީސް އޮފީހުން ވިދާޅުވެއްޖެއެވެ.
ރައީސް އޮފީހުގެ ޕޮލިސީ ސެކްރެޓަރީ އަހުމަދު ހަމްދާން މިއަދު ވިދާޅުވީ ސަރުކާރުން އިންވެސްޓްކުރާ މަޝްރޫޢުތައް ނިމުމުން އައްޑޫގައި މިހާރު ރަޖިސްޓަރީ ކޮށްފައިވާ 1528 އެނދުގެ އިތުރުން ގާތްގަނޑަކަށް 7000 އެނދު އިތުރުކުރެވިގެންދާނެ ކަމަށެވެ. މި އަދަދުން މިހާރުގެ ބެޑް ކެޕޭސިޓީ އަށް 4 ގުނައަށްވުރެ ބޮޑު އަދަދެއް އިތުރުވާނެ ކަމަށް ހަމްދާން ވިދާޅުވިއެވެ.
ހަމްދާން ވިދާޅުވީ އައްޑޫގެ ޓޫރިޒަމްގެ އިތުރުން މުޅި އިޤްތިޞާދީ ލޭންޑްސްކޭޕް ބަދަލުކޮށްލުމަށް އެހީތެރިވެދިނުމުގެ ގޮތުން އައްޑޫގައި ހިންގާ ވިޔަފާރިތަކަށް ޓެކްސް ކޮންސެޝަންތަކެއް ދިނުމަށް ކުރަންޖެހޭ މަސައްކަތްތައް ސަރުކާރުން ކުރަމުންދާ ކަމަށެވެ.
އަދި ފަތުރުވެރިކަމަށް ފަހިކުރުމަށް، 2021 ޖަނަވަރީން ފެށިގެން އައްޑޫގެ ބިމު ކުލި ރިސޯޓުތަކަށް އަކަ މީޓަރަކަށް 8 ޑޮލަރުން 2 ޑޮލަރަށް ކުޑަކޮށް އެންމެ ބޮޑުވެގެން ދައްކަންޖެހޭ ކުލި 2 މިލިއަން ޑޮލަރުން 8 ލައްކަ ޑޮލަރަށް ކުޑަކުރެވުނު ކަމަށާއި ކުރިން އެއްވެސް ސަރުކާރަކުން އަޅާނުލައި ދޫކޮށްލާފައިވާ ޝަންގްރިލާގެ މައްސަލަ ހައްލުކޮށްދިނުމަށް ޝެއަރހޯލްޑަރ އެއްބަސްވުމުގެ ދަށުން ސަރުކާރުން ދޭންޖެހޭ ލޯނު ވެސް މި ސަރުކާރުން ދީފައިވާ ކަމަށް ހަމްދާން ވިދާޅުވިއެވެ.
“މިހާރު ހިންގަމުންދާ ރިޒޯޓުތަކަށް އެހީތެރިވެދިނުމުގެ ގޮތުން ކޮށްފައިވާ ކަންތައްތަކުގެ އިތުރުން ސަރުކާރުން ސީދާ އައްޑޫގެ ޓޫރިޒަމް ކުރިއެރުވުމަށް އިންޓަރވެންޝަނެއް ހަދަންޖެހޭ ކަމަށް ދެކި، އިންވެސްޓްކުރަން ނިންމައި ސަރުކާރުން މަޝްރޫޢުތަކެއް ރާވައި މަސައްކަތް ވަނީ ފެށިފައި” ހަމްދާން ވިދާޅުވިއެވެ.
އެގޮތުން ރިސޯޓު ތަރައްޤީކުރުމަށް 8.3 ހެކްޓަރުގެ 3 ރަށާއި 5 ހެކްޓަރުގެ 2 ރަށް އުފެއްދުމުގެ މަސައްކަތް ކުރިއަށްދާ ކަމަށާއި މި ރަށްތަކުން 500 ކޮޓަރި ބާޒާރަށް ނެރެވޭނެ ކަމަށް ހަމްދާން ވިދާޅުވިއެވެ.
އައްޑޫ މީހުނަށް ތިހާ ވަރުން ރިޝްވަތު ދައުލަތުން ދޭން އުޅެނީ ކީއްވެތޯ ؟