ރިޔާސީ ރޭހުގައި ދަ ޑިމޮކްރެޓްސް އުޅެނީ ފަހަތުގައި ކަމަށް ޝިޔާމް ވިދާޅުވެއްޖެ
ރިޔާސީ ރޭހުގައި، އަލަށް އުފެއްދި "ދަ ޑިމޮކްރެޓްސް" އުޅެނީ ފަހަތުގައިކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު، އަދި ޕީޕީއެމްގެ ނައިބު ރައީީސް އަޙްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވެފައިވަނީ ދަ ޑިމޮކްރެޓްސް ޕާޓީ އުފެއްދުމަށް ރޭގައި ބޭއްވި ޖަލްސާގައި، މިއަހަރުގެ ރިޔާސީ ރޭހުގައި އެންމެ ބުއްދިވެރިވާނީ ރައީސް ނަޝީދާއި ރައީސް ޔާމީނު ވާދަނުކޮށް، ގޮތް ދޫކުރުމަށްފަހު ދެބޭފުޅުން ގުޅިގެން މަސައްކަތް ކުރުމުންކަމަށް ކުރީގެ ރައީސް، ރައީސް ނަޝީދު ވިދާޅުވުމުން، އެ ވާހަކަފުޅަށް ރައްދުދެއްވަމުންނެވެ.
ޝިޔާމް ކުރެއްވި ޓްވީޓެއްގައި ވިދާޅުވީ، ރޭގެ ޖަލްސާގައި ރައީސް ނަޝީދު ވިދާޅުވީ އެމަނިކުފާނުގެ ވިސްނުންފުޅުކަމަށާއި، މި ރިޔާސީ އިންތިޚާބުގައި ރައީސް ނަޝީދު އަދި ދަ ޑިމޮކްރެޓްސް އުޅެނީ ތަންކޮޅެއް ފަހަތުގައި ކަމަށެވެ.
"އަދި އެބޭފުޅުން ކެނޑިޑޭޓެއްވެސް ނުދައްކަވާ. ޕީޕިއެމް/ޕީއެންސީން މާކުރިން ވަނީ ރައީސް ޔާމީން ކެނޑިޑޭޓެއްގެ ގޮތުގައި ނިންމާ ކެމްޕޭންވެސް ފަށާފައި" ޝިޔާމުގެ ޓްވީޓުގައިވެއެވެ.
އިދިކޮޅު ޕީޕީއެމް އިން ރައީސް ޔާމީނަށް އެ ޕާޓީގެ ރިޔާސީ ޓިކެޓު ދީފައިވާއިރު، އެމަނިކުފާނު ގެންދަވަނީ 11 އަހަރުގެ ޖަލު ޙުކުމެއް ތަންފީޒު ކުރައްވަމުންނެވެ.
