ނާޒިމްގެ ތަޢުލީމީ ސިޔާސަތަކީ ޕީއެޗްޑީއާ ހަމައަށް ހިލޭ ކިޔަވާދިނުން ކަމަށް ވިދާޅުވެއްޖެ
ދަނގެތީ ދާއިރާގެ މެމްބަރު އަދި މޯލްޑިވްސް ނެޝަނަލް ޕާޓީގެ ރިޔާސީ ކެންޑިޑޭޓް، ކާނަލް ރިޓަޔާޑް މުހައްމަދު ނާޒިމްގެ ތަޢުލީމީ ސިޔާސަތަކީ ޕީއެޗްޑީއާ ހަމައަށް ހިލޭ ކިޔަވާދިނުންކަމަށް މުޙައްމަދު ނާޒިމު ވިދާޅުވެއްޖެއެވެ.
"އުޖާލާ ޒަމާން" ކެމްޕެއިންގެ ދަށުން ކުޅުދުއްފުށީގައި ރޭ ބޭއްވި ޖަލްސާގައި ވާހަކަ ދައްކަވަމުން ނާޒިމް ވިދާޅުވީ، އެބޭފުޅާގެ ތައުލީމީ ސިޔާސަތަކީ ނާސަރީން ފެށިގެން ޕީއެޗްޑީއާ ހަމައަށް ހިލޭ ކިޔަވައި ދިނުން ކަމަށާއި އެކަމަށް ރައްޔިތުންގެ އަތުން ބޮޑު ހަރަދެއް ހޭދަކުރަން ނުޖެހޭ ގޮތް ހެދުން ކަމަށެވެ.
"އަޅުގަނޑުގެ ތައުލީމުގެ ސިޔާސަތަކީ ނާސަރީން ފެށިގެން ޕީއެޗްޑީއާ ހަމައަށް ހިލޭ ކިޔަވާދިނުން. ޔަގީން ކުރައްވާ އިރާދަކުރެއްވިއްޔާ އަޅުގަނޑުގެ ވެރިކަމެއްގައި ތިބޭފުޅުންގެ އަތުން އެންމެ ބޮޑު ލާރިއެއްވެސް ތިބޭފުޅުންގެ ކިޔެވުމަށް ހޭދަ ކުރާކަަށް ނުޖެހޭނެ" ނާޒިމް ވިދާޅުވިއެވެ.
ނާޒިމް ވިދާޅުވީ އެމްއެންޕީގެ ސަރުކާރުގެ ސިޔާސަތުތައް އެހެން ޕާޓީތަކާއި ވަރަށް ތަފާތުވާނެކަމަށާއި، ބޭނުންވަނީ ރައްޔިތުންގެ ލާބައާއި މަންފާ ލިބޭ ވެރިކަމެއްކޮށް ރައްޔިތުންނާއި ވަރަށް ގާތުން މަސައްކަތްކުރެއްވުމަށެވެ.
އެގޮތުން، ތަޢުލީމީ ފުރުޞަތުތައް ފަހިކޮށް، ފުޅާކުރުމަކީ ވަރަށް މުހިންމު އަދި ބޮޑު ސިޔާސަތަަށް ވާނެކަމަށެވެ. ތަޢުލީމީ ސިޔާސަތުގެ ދަށުން ނުކުޅެދުންތެރިކަން ހުންނަ މީހުންނަށް ހުނަރާއި ފަންނު ހޯދައިދޭނެކަމަށްވެސް ނާޒިމް ވިދާޅުވިއެވެ.
"އަޅުގަނޑުމެންނާއި، މި ސަރުކާރާއި އޮތް ތަފާތަކީ މޮޅާއި ދެރަ ތަފާތުގެ ސިޔާސަތު، މި ސަރުކާރުގެ ސިޔާސަތަކީ ބޭސްވެސް މޮޅެތި ގައުމުތަކުން ކުރެވޭނީ މޮޅުމީހާ، ތައުލީމުވެސް ލިބޭނީ ހަމައެކަނި ކޮލެޖްތަކުގައި، ހަަމައެކަނި ބިންވެރިވެގެންވެސް މި ދަނީ ވަކިވަކި ރަށްރަށުގައި އުފަންވީމަ" ނާޒިމް އިތުރަށް ވިދާޅުވިއެވެ.
މީގެ އިތުރުން، ނާޒިމް ވަނީ މި ސަރުކާރުގެ ބޯ ހިޔާވަހިކަމުގެ ސިޔާސަތަށް ފާޑުވިދާޅުވެއެވެ. އެގޮތުން ހިލޭ ގޯތިި ދޭ އުސޫލަކީ ކުރަން ހެޔޮވާވަރު ކަމެއް ނޫންކަމަށާއި އެ މަޝްރޫޢު ކުރިއަށް ގެންދަނޯ ސިޔާސީ ވަކި މަޤްޞަދެއްގައި ކަމަށެވެ. އަދި އެއީ ރައްޔިތުންގެ ވޯޓު ހޯޯދަންކުރާ ކަމެއްކަމަށާއި ރައްޔިތުން ހޭއަރާ ތިބުމަށް ނާޒިމް ގޮވާލެއްވިއެވެ.
މި ސަރުކާރުގެ ބޯހިޔާވަހިކަމުގެ ހަމަނުޖެއްސޭނެ ބައެއް ވާހަކަތައް ވެސް ފާހަގަކުރައްވަމުން ނާޒިމް ވިދާޅުވީ، ބިން ހިއްކަން ދާ ބޮޑު ހަރަދާއި، އެ ބިމުގައި ބަޔަކު އާބާދު ކުރުމަށް ހިނގާނެ ދިގު މުއްދަތު އޮއްވައި އެތަންތަނުން އާންމުންނަށް ލިބޭ ގޯތި ތަރައްގީ ކުރަން ބޮޑެތި ވިޔަފާރިތަކުން އަތުލުމުން އަނެއްކާވެސް ދިވެހިން އަޅުވެތިވާނެ ކަމަށެވެ.
މީގެ އިތުރުން، ބޮޑުތިލަދުންމައްޗަކީ، ރާއްޖޭގެ ތަރައްގީގެ ނާރެސް ކަމަށް ދެކެވަޑައިގަންނަވާ ކަމަށާއި، އިންޑިއާ ކަނޑު ހުރަސްކޮށް ދަތުރުކުރާ ވިޔަފާރީގެ ގާފިލާތައް ނުވަތަ ބޯޓުފަހަރުގެ އަދަދުތައް ވިދާޅުވެ ދެއްވައި އެއީ ހެޔޮގޮތުގައި ޕްލޭން ކުރެވި ރާވައިގެން ގެންދެވިއްޖެނަމަ ބޮޑުތިލަދުންމައްޗަށް ގެނެވޭނެ އިގްތިސޯދީ އިންގިލާބަކަށް ވާނެ ކަމަށް ނާޒިމް ވިދާޅުވެއެވެ. ހަމައެއާއެކު އިހަވަންދިއްޕޮޅާއި އެ ސަރަހައްދުގެ ތަރައްގީގެ ތަސައްވުރެއް އޮތް ކަމަށް ވިދާޅުވެ ނާޒިމް ވަނީ ބޮދުތިލަތުންމައްޗަށް އުންމީދެއް ދެއްވާފައެވެ.
ރޭގެ ޖަލްސާގައި ވާހަކ ދައްކަވަމުން، ނާޒިމް ވަނީ، ބޭރުގެ ވަކި ގައުމަކަށް އަޅުވެތިވެގެން ތިބުން ނިމުމަކަށް ގެންނަވައި ނާޒިމުގެ ސަރުކާރެއްގެ ހާރިޖީ ސިޔާސަތަކަށް ވާނީ ހުޅުވާލެވިފައިވާ ސިޔާސަތަކަށް ކަމަށް ވެސް ވިދާޅުވެފައެވެ.
Ads by STO
