ޑިމޮކްރެޓުންނާއި ނުލައި ދެން އަންނަ ސަރުކާރެއް ނުއުފެއްދޭނެ: އީވާ
ޑިމޮކްރެޓުންނާއި ނުލައި ދެން އަންނަ ސަރުކާރު އުފެއްދޭނެގޮތެއް ނެތްކަމަށް ގަލޮޅު އުތުރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ ވިދާޅުވެއްޖެއެވެ.
ޑިމޮކްރެޓްސްގެ ޖަގަހަ ހުޅުވުމަށް ބޭއްވި ޖަލްސާގައި ވާހަކަފުޅު ދައްކަވަމުން އެ ޕާޓީގެ އުފެއްދުމުގައި އިސްކޮށް ހަރަކާތްތެރިވެވަޑައިގެންނެވި އީވާ އަބްދުﷲ ވިދާޅުވީ، ރާއްޖޭގެ އެންމެ ބޮޑު ސިޔާސީ ޕާޓީ ކަމުގައިވާ އެމްޑީޕީގެ ގިނަ މެންބަރުންގެ ވޯޓު އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި ލިބޭނީ އެ ޕާޓީން ވަކިވި މެންބަރުން އުފެއްދެވި އާ ޕާޓީ "ޑިމޮކްރެޓްސް" އަށް ކަމަށެވެ. އަދި ސެޕްޓެމްބަރު މަހުގައި އޮންނަ އިންތިހާބުން ޔަގީންވާ އެއް ކަމަކީ ރައީސް އިބްރާހީމް މުހައްމަދު ސޯލިހުގެ ވެރިކަން ނިމޭނެ ކަމެވެ.
ރޭގެ ބައްދަލުވުމުގައި ރައީސް ނަޝީދުގެ ޙިއްޞާ އޮންނަ އޯޝަން ވީކްލީ ނޫހުގައި އާންމުކޮށްފައިވާ، އިންތިޚާބާ ގުޅޭ ތަފާސްހިސާބުތަކަށް އަލިއަޅުވާލައްވަމުން އީވާ ވިދާޅުވީ، ކުރިއަށް އޮތް އިންތިހާބުގައި ރައީސް ސޯލިހަށް ލިބޭނީ 29 އިންސައްތަ ވޯޓުކަމަށެވެ.
"އަޅުގަނޑުމެން ޑިމޮކްރެޓުން އެމްޑީޕީގެ ބޮޑުބައި ދަމައިގަންނާނަން. އެމްޑީޕީގެ ބޮޑުބައި ވެސް ދަމައިގަންނަނީ އަދި އޭގެ އިތުރަށް ވެސް ވިއްސަކަށް ހާސް ވޯޓު އަޅުގަނޑުމެން ހޯދާނަން. ބާކީ އޮތީ 70 ހާހެއްހާ ވޯޓު ރައީސް އިބްރާހީމަށް ލިބޭނީ،" އީވާ ވިދާޅުވި އެވެ.
ރިޔާސީ އިންތިޚާބަށް ޕާޓީތަކުން ނުކުންނަނީ އަމިއްލަ ޕާޓީގެ ވޯޓު ޔަޤީންކޮށްފައިކަމަށާއި، ނަމަވެސް ރައީސް ޞާލިޙުގެ ޕާޓީ ދެބައިކޮށްލުމަށްފަހު އެ ޕާޓީއަށް ލިބޭ ވޯޓުކޮޅުވެސް އެމަނިކުފާނުވަނީ ގެއްލުވާލައްވާފައި ކަމަށް އީވާ ވިދާޅުވިއެވެ. އަދި ރައީސް ޞާލިޙުގެ ދައުރު ފަސް އަހަރު ކުރިން ފެށި އިރު 52 ޕަސެންޓާއެކު ފެށްޓެވި ނަމަވެސް، މިހާރު އެމަނިކުފާނުގެ ޕާފޯމަންސް ހުރި ގޮތުންނާއި މިހާރު އިޕީނިއަން ޕޯލްތައް ހުރިގޮތަށް ބަލާއިރު، ރައީސް ޞާލިހަށް އިތް ތާއީދު 15 ޕަސެންޓަށް ވެއްޓިއްޖެކަމަށްވެސް އީވާ ވިދާޅުވިއެވެ.
މީގެ އިތުރުން އީވާ ވިދާޅުވީ، މި ސަރުކާރުގެ ވެރިކަން ނިމުމަކަށް އަންނައިރު، ކޮންޓްރެކްޓަކަށް އަމިއްލަ ނަފްޞު ވިއްކާލި މަޖިލިސް މެމްބަރުންނާއި، ރޮލެކްސް ގަޑިއަކަށް ކުންފުނީގެ ތިޖުރި "ކަހާލި" އެމްޑިންނާއި، ފެނަކައާއި އާރްޑީސީގެ ވައްކަން މަތިޖަހައިދިން ވަޒީރުން މަގުމަތިވާނެކަމަށެވެ.
"އަޅުގަނޑު ތިބޭފުޅުންނަށް މި ދަންނަވަނީ އަންނަ މަހުގެ މި ދުވަހު އަދާލަތު ޕާޓީއާ، ސަން ސިޔާމަކާ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އަރިހެއްގައި ނުތިބޭނެ.... ޔަގީންވާ ދެވަނަ ކަމަކީ ސެޕްޓެމްބަރު 9 ގައި އުފައްދާ ސަރުކާރެއް އުފައްދާނީ ޑިމޮކްރެޓުން، ޑިމޮކްރެޓުންނާ ނުލައި ދެން އަންނަ ސަރުކާރެއް ނޫފެދޭނެ... މި ވެރިކަން ނިމޭއިރު މަގުމަތި ނުވާނީ ވައްކަމަށް ނޯ ޖަހާފައި، ހުސްއަތާ ވެރިކަން ދޫކޮށްލާފައި ނުކުމެވަޑައިގެން ހިތްވަރުގަދަ ޑިމޮކްރެޓުން،" އީވާ ވިދާޅުވި އެވެ.
އެމްޑީޕީގެ ޕްރައިމަރީ އިންތިޚާބުން ރައީސް ޞާލިޙްއާއި ވާދަކުރައްވައިގެން ރައީސް ނަޝީދަށް ލިބިވަޑައިގެންނެވި ނާކާމިޔާބީއަށްފަހު، އެމްޑީޕީގައި ތިއްބެވި ރައީސް ނަޝީދަށް ތާއީދުކުރައްވާ މަޖިލިސް މެމްބަރުން އިސްވެ އުފެއްދި ޑިމޮކްރެޓްސް އިން ކުރިއަށް އޮތް ރިޔާސީ އިންތިހާބުގައި ވާދަކުރާނެކަން އިއުލާން ކުރިނަމަވެސް، އެ ޕާޓީގެ ކެންޑިޑޭޓަކީ ކޮން ބޭފުޅެއްކަން ހާމަކޮށްފައިނުވެއެވެ.
ކުރިއަށް އޮތް އިންތިޚާބުގައި އެމްޑީޕީއާއި ޑިމޮކްރެޓްސް އިން ވާދަކުރާނެކަން އިއުލާންކޮށްފައިވާއިރު، އެ އިންތިޚާބުގައި ވާދަކުރައްވާނެކަމަށް މިހާތަނަށް އިޢުލާނުކޮށްފައިވަނީ ޕީޕީއެމްގެ ރައީސް އަބްދުﷲ ޔާމީން އާއި، ޖުމްހޫރީ ޕާޓީގެ ލީޑަރު ގާސިމް އިބްރާހީމް އާއި، އެމްއެންޕީގެ ރައީސް މުހައްމަދު ނާޒިމް އާއި ކުރީގެ ހޯމް މިނިސްޓަރު އުމަރު ނަސީރުގެ އިތުރުން ކުރީގެ ބަންޑާރަނައިބު ޑރ. މުހައްމަދު މުނައްވަރު އެވެ.
ދައުލަތުގެ މާލިއްޔަތު ލޫޓުވާ ސިޔާސީ ވަފާތެރި ކެހިވެރި ޗޯރުން ހައްތާވެސް މިއުޅެނީ’ ބައިޅަން ބިރުދައްކަން އުފެއްދި ގުރޫޕެއް !