24 ގަޑިއިރު ސަރުކާރުގެ ޚިދުމަތްތައް ފޯރުކޮށްދޭ "ވަންގަވް" ފޯޓަލް ލޯންޗްކޮށްފި
ސަރުކާރުގެ ޚިދުމަތްތައް 24 ގަޑިއިރު ލިބޭ ޕޯޓަލެއް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ލޯންޗު ކޮށްދެއްވައިފިއެވެ.
ސަރުކާރުގެ މުއައްސަސާތަކުގެ ޚިދުމަތްތައް އެއް ވިގުއަކުން ފޯރުކޯށްދިނުމުގެ ގޮތުން ތަޢާރަފުކޮށްފައިވާ "ވަންގަވް" ޕޯޓަލްގެ ޚިދުމަތްތައް ލޯންޗުކުރުމަށް މިއަދު ޙާއްޞަ ރަސްމިއްޔާތެއް ސަލްޓަން ޕާކުގައި 09:45ގައި ބާއްވާފައިވާއިރު، މި ރަސްމިއްޔާތުގައި ސަރުކާރުގެ ބައެއް މިނިސްޓަރުންވެސްވަނީ ބައިވެރިވެވަޑައިގެންފައެވެ.
"ވަންގަވް" ތައްޔާރުކުރެވިފައިވަނީ އެންމެންނަށްވެސް ފަސޭހަކަމާއިއެކު ބޭނުންކުރެވޭ ގޮތަށެވެ. އެ ޕޯޓަލް ބޭނުންކުރުމަށް އިތުރު ތަމްރީނެއް ނުވަތަ އިތުރު ތަޖުރިބާއެއްވެސް ބޭނުންނުވާނެކަމަށް އުނދަގުލަކާއި ނުލައި ސަރުކާރުގެ ޚިދުމަތްތަކަށް އެދި ހުށަހެޅޭއިރު ވަންގަވް އިން ޚިމަތްތަކަށް އެދި ހުށައަޅާ އެޕްލިކޭޝަން ފޯމްތައް ފަރުމާކޮށްފައިވާނީ ފަސޭހަކަމާއި އެކީ ޚިދުމަތްތަކަށް އެދި ހުށައެޅޭނެ ގޮތަށެވެ. އަދި ޚިދުމަތްތަކާ ގުޅެ ހުރިހާ މައުލޫމާތާއި ލިޔެކިޔުންތައް ހާމަކޮށް އެއްވެސް އޮޅުމެއް ނެތި ޔަގީންކަމާއެކު ޚިދުމަތަށް އެދުމަށް ބޭނުން މައުލޫމާތުތައް ކިޔާލެވޭނެކަމަށް މަޢުލޫމާތު ލިބެއެވެ.
މި ޕޯޓަލްއަކީ ޑިޖިޓަލް ސަރުކާރެއްގެ ފެށުން ކަމަށް ސިފަކުރައްވައި ރައީސް ޞާލިޙް ވިދާޅުވީ މި ސަރުކާރަކީ ރަސްމީ ގަޑި ނިމުމުން ދޮރު ބަންދުކޮށް، ޚިދުމަތްތައް މެދުކަނޑާލާނެ ސަރުކާރެއް ނޫންކަން ފާހަގަކުރައްވައި، ދުނިޔޭގެ ކޮންމެ ހިސާބެއްގައި ހުރެގެންވެސް، 24 ގަޑިއިރު ޚިދުމަތްތައް ލިބިގަނެވޭނެ ކަމަށް ވިދާޅުވެފައެވެ. އަދި މިއަދަކީ ރައްޔިތުންނާ ގާތުން، ލާ މަރުކަޒުކޮށް ޚިދުމަތް ދިނުމުގައި ތާރީޚީ ދުވަހެއްކަމަށްވެސް އެމަނިކުފާނު ވިދާޅުވިއެވެ.
ފޮޓޯ: ރައީސުލްޖުމްހޫރިއްޔާގެ އޮފީސް
މި ސަރުކާރުގެ އެންމެ ޚާއްޞަ ސިފައަކީ ރައްޔިތުން ހޯދަން ބޭނުންވާ ޚިދުމަތްތައް ފަސޭހަކަމާއެކު ލިބިގަނެވުންކަމަށާއި، ސަރުކާރުގެ ޚިދުމަތްތައް ލިބިގަތުމުގައި ރައްޔިތުން އުފުލަމުން އައި ތަކުލީފުތައް މި ވިއުގައިގެ ސަބަބުން ކުޑަވެގެންދާނެ ކަމަށްވެސް ރައީސް ވިދާޅުވިއެވެ. މިސާލަކަށް އަތޮޅުތަކުން މާލެ އައުމާއި، އައިސް ގިނަ ވަގުތު ކިއޫގައި ތިބެން ޖެހުމާއި، އެކަށީގެންވާ މައުލޫމާތު ނުލިބުމާއި، އެތަކެއް ފޯމުތަކެއް ހުށަހަޅަން ޖެހުންފަދަ ތަކުލީފުތައް ރައީސްގެ ވާހަކަފުޅުގައި ފާހަގަ ކުރެއްވިއެވެ.
މީގެ އިތުރުން ރައީސް ޞާލިޙު ވިދާޅުވީ، ޑިޖިޓަލް ސަރުކާރު ހިނގައިގަންނައިރު، މާލެއާއި އައްޑޫ އަދި ފުވައްމުލަކު ސިޓީގައި މި ޕޯޓަލްގެ ސަޕޯޓު ސެންޓަރުތައް ޤާއިމު ކުރެވިފައިވާއިރު ކުރިއަށް އޮތް ތަނުގައި އިތުރު ސަރަޙައްދުތަކުގައިވެސް ސަޕޯޓު ސެންޓަރުތައް ޤާއިމު ކުރައްވާނެ ކަމަށެވެ.
"ވަންގަވް" ޕޯޓަލް ފަރުމާކުރެވިފައިވަނީ ރައްޔިތުންގެ ޒާތީ މަޢުލޫމާތުތައް ރައްކާކުރެވޭނެ ގޮތަށެވެ. އަދި ދިވެހި ކޮންމެ ރައްޔިތަކުވެސް އެ ޕޯޓަލް ބޭނުންކުރެއްވުމަށް "އީފާސް" އެކައުންޓެއް ހަދަން މުހިންމުއިރު، ޚިދުމަތްތަކަށް ހުށަހަޅަން އެޕްލިކޭޝަން ފޯމް ނުވަތަ އެހެނިހެން ލިޔެކިޔުންތައް ޕްރިންޓްކުރަން ނުޖެހޭނެ ކަމަށާއި، ޚިދުމަތްތައް ހޯދަން އިންތިޒާރުކުރާ މުއްދަތު ވަރަށް ބޮޑަށް ކުޑަވާނެ ކަމަށް މި ޕޯޓަލްގެ މަސައްކަތް ކުރުމަށް އެންމެ އިސްކޮށް ހަރަކާތްތެރިވި މުހައްމަދު ޝިނާޒު ވިދާޅުވިއެވެ.
މީގެ އިތުރުން، މި ޕޯޓަލްގައި ހުރިހާ ޚިދުމަތެއް ބަލައި ގަންނާނެ ކަމަށާއި، މައުލޫމާތު ރަނގަޅު ނޫން ކަމަށްވާނަމަ އެ ހަމައެކަނި މައްސަލަ ދިމާވި މައުލޫމާތު ރަނގަޅުކޮށްލުމަށް އެދި އެމީހަކަށް މެސެޖެއް އަދި އީމެއިލްއެއް ލިބޭނެ ކަމަށާއި ކުރިއަށް އޮތްތަނުގައި 1500 އަށް ގުޅާލައިގެން މި ނިޒާމުތަކުގައި ހުރި އިދާރާތަކުގެ މަޢުލޫމާތު ލިބޭނެކަމަށާއި، މުވައްޒަފެއް ސަލާމުގައި ހުރެގެން މައުލޫމާތު ނުވަތަ ޚިދުމަތް ނުލިބިގެން އުޅެން ނުޖެހޭ ކަމަށްވެސް ޝިނާޒު ވިދާޅުވިއެވެ.
"ސަރވިސްއަށް އެޕްލައި ކުރުމަށްފަހު މިޖެހެނީ ވާނުވާ ނޭނގިގެން ގުޅަން. ކިހިނެތްތޯވީ؟ ކޮން ދުވަހަކަށްތޯ ލިބޭނީ. ކުރީގައި އަޅުގަނޑު ދެންނެވި ސަރވިސް ގައިޑްގެ ވާހަކަ އެގައިޑްގައި އިންނާނެ ސަރވިސްއަށް އެޕްލައި ކުރީމަ ކިތައް ދުވަހުންތޯ. ސަރވިސް ފޯމް ފިލް ކުރެވޭނީ ކިތައް މިނެޓުންތޯ. ޕޭމަންޓެއް ބޭނުންވޭތޯ. އެއީ ސަރވިސްއަށް އެޕްލައި ކުރީމަ އެބަ އެނގޭ މިސަރވިސް އިނީ ކިހައި ހިސާބެއްގައިކަން. އެހެންވީމަ ގުޅަންޖެހޭ ބައި މަދުވީ. ވަގުތު މި ސަލާމަތްވީ" ޝިނާޒު ވިދާޅުވިއެވެ.
ވަކި ސްޓޭންޑަޑްއެއް ކަނޑައަޅައި ތައްޔާރުކޮށްފައިވާ "ވަންގަވް" ޕޯޓަލް އަކީ މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ދަށުން ޓްރޭޑް ނެޓް ކޯޕަރޭޝަން މެދުވެރިކޮށް ކުރިއަށްގެންދާ ޕްލެޓްފޯމެކެވެ. މި ފޯޓަލްގެ ސަބަބުން ސަރުކާރުގެ މިނިސްތްރީތަކުން ދޭ ޚިދުމަތްތަކުގެ ފެންވަރު ރަނގަޅުވެ، ދެފުށް ފެންނަ ނިޒާމެއް ޤާއިމުކުރެވިގެންދާނެއެވެ. އަދި މި ޕޯޓަލްގެ ޚިދުމަތްތަކުގެ ފުރަތަމަ ފޭސްގައި 5 އިދާރާއަކާއެކު މަސައްކަތްކުރަމުންދާއިރު، ކުރިއަށް އޮތް ތަނުގައި ސަރުކާރުގެ ހުރިހާ އިދާރާތަކުގެ ޚިދުމަތްތައްވެސް އެ ޕޯޓަލްގެ ތެރެއިން ލިބޭނެކަމަށް މަޢުލޫމާތު ލިބެއެވެ.
