އާބާދީ މަދު ރަށްރަށް ތަރައްޤީނުވީ ކުރީގެ ވެރިން ސިޔާސީ ވިސްނުން އިސްކުރުމުން: ރައީސް ޞާލިޙް
އާބާދީ މަދު ކުދި ރަށްރަށަށް ތަރައްޤީ ނައީ ކުރީގެ ވެރިން ސިޔާސީ ވިސްނުން އިސްކުރުމުން ކަމަށް ރައީސް އިބްރާޙިމް މުހައްމަދު ސޯލިހް ވިދާޅުވެއްޖެއެވެ.
2023 ވަނަ އަހަރުގެ ރިޔާސީ އިންތިހާބުގެ ކެމްޕެއިން ތެރެއިން މ އަދި ވ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މ ނާލާފުށްޓަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ ރައްޔިތުންނަށް ލިބެންޖެހޭ އަސާސި ހިދުމަތްތައް ލިބެންޖެހޭނީ އެއްވެސް ތަފާތު ކުރުމެއް ނެތި ކަމަށާއި، ކޮންމެ ރައްޔިތަކަށްވެސް އެ ރައްޔިތަކު ހުރި ތަނަކުން އަސާސި ހިދުމަތްތައް ލިބެންޖެހޭނެ ކަމަށެވެ.
ސަރުކާރުތަކުގެ ސިޔާސަތުތައް ކުރިން ބައްޓަންކުރެވިފައި އޮތް ގޮތުން އެ ރަށުގެ ތަރައްޤީގެ މަސައްކަތްތައް ލިސްޓަށް އަރަނީ ވަރަށް މަދުންކަން ފާހަގަކުރައްވަމުން ރައީސް ޞާލިޙް ވިދާޅުވީ، އެ ސިޔާސަތުތަކާ އެއްގޮތަށް އެކަންކަން ހިނގަމުންދާކަމަށްވާނަމަ، ނާލާފުއްޓަށް ތަރައްޤީއެއް އަންނާނީ މީގެ 15 ނުވަތަ 20 ވަރަކަށް އަހަރު ފަހުންކަމަށެވެ. އަދި އެކަންތައް މި ސަރުކާރު އައުމާއެކު ބަދަލުވެގެން ދިޔަކަމަށް ރައީސް ޞާލިޙް ވިދާޅުވިއެވެ.
ނާލާފުށީގައި ކުރިއަށްގެންދާ މަޝްރޫއުތަކުގެ ތެރޭގައި ހިމެނޭ އެ ރަށު ފެނާ ނަރުދަމާގެ ނިޒާމު ތަރައްޤީކުރުމުގައި ދިމާވާ ލަސްތައް ފާހަގަކޮށް ރައީސް ޞާލިޙް ވިދާޅުވީ އެގޮތަށް ބައެއްފަހަރު ދިމާވަނީ މަސައްކަތްތައް ހަވާލުކުރެވޭ ބައެއް ކުންފުނިތަކުން މަސައްކަތް ކުރުމުގައި ފަހަތަށް ޖެހޭތީ ކަމަށާއި ނަމަވެސް އެކަމަށް ހައްލެއް ހޯދުމަށް މަސައްކަތް ކުރައްވާ ކަމަށެވެ.
ރައީސް ޞާލިޙް ވިދާޅުވީ ތަފާތުކުރުމެއްނެތި ރައްޔިތުންނަށް ޚިދުމަތްތައް ފޯރުކޮށްދެމުންދަނީ، ރައްޔިތުންގެ ދިރިއުޅުން ތަރައްޤީކުރުމަށް ކަމަށާއި ނާލާފުށްޓަށް ދިމާވެފައިވާ އެންމެ ބޮޑު މައްސަލައަކީ ބަނދަރުގެ މައްސަލަކަމަށާއި މިސަރުކާރުގައި އެންމެ ފުރަތަމަވެސް ކުރީ އެ މަސައްކަތް ކަމަށެވެ. އެހެންނަމަވެސް ބަނދަރުގެ ޖާގަ ކުޑަވުމުން، ބަނދަރު ބޮޑު ކުރުމަށް މެނިފެސްޓޯގައި ހިމަނާފައިވާ ކަމަށެވެ.
މީގެ އިތުރުން، ނާލާފުއްޓާއި މ. މުލި ގުޅުވާލައްވާނެކަމަށާއި، އެ ދެ ރަށް ގުޅުމާލުމުން ނާލާފުށިން ލިބެންނެތް ހިދުމަތްތައް ހޯދުމަށް އެއްގަމުމަގުން މުއްޔަށް ދެވޭނެ ކަމަށާއި، އެ މަސައްކަތް އޮތީ ޕްލޭން ކުރެވިފައި ކަމަށެވެ. މި މަސައްކަތް މުލީ އެއާޕޯޓް ނިމުމާއެކު ފަށާނެ ކަމަށްވެސް އެމަނިކުފާނު ވިދާޅުވިއެވެ.
ރައީސް ޞާލިޙް ނާލާފުށްޓަށް ކުރެއްވި ދަތުރުފުޅުގައި އެ ރަށުގައި ޤާއިމްކުރި އާ އިންޖީނުގެ ހުޅުވައިދެއްވާނެކަމަށާއި، 150 ރަށެއްގައި އިންޖީނު ބަދަލުކުރެވި އެ މަސައްކަތްތައް ނިމެމުންދާކަން ފާހަގަކުރައްވަމުން އެމަނިކުފާނު ވިދާޅުވީ، އެފަދަ މަޝްރޫއުތަކަކީ ކުރިއަށް އޮތް 40، 50 އަހަރަށް އިތުރު ބަދަލެއް ގެންނަން ނުޖެހޭ ގޮތަށް ކުރުމަށްޓަކައި އަމާޒު ހިފައިގެން ކުރާ މަސައްކަތްތަކެއް ކަމަށެވެ.
