ޝިޔާމްގެ ރައްދު އިމްރާނަށް: އަމިއްލަ ޕާޓީގައި ހުކުރު ވެސް ހަމަ ނުވޭ

އަދާލަތު ޕާޓީގެ ބައިވެރިވުމާއެކު އެމްޑީޕީއަށް ދެވަނަ ދައުރެއް ލިބިއްޖެނަމަ، ސިޔާސީ ހަރަކާާތް ހިންގުމުގެ ނަމުގައި، ވެލި އުކައި، ފެން އުކަން ޖާގަ ނުދެއްވާނެ ކަމަށް އަދާލަތު ޕާޓީގެ ރައީީސް އަދި ހޯމް މިނިސްޓަރު އިމްރާން ވިދާޅުވުމުން, ޕީޕީއެމްގެ ނައިބު ރައީސް, ނައިފަރު ދާއިރާގެ މެންބަރު އަޙްމަދު ޝިޔާމް ރައްދު ދެއްވައިފިއެވެ.

Ads by STELCO

ރައީސް އިބްރާހީމް މުޙައްމަދު ޞާލިޙް ރިޔާސީ ކެމްޕެއިނަށް މ.ދިއްގަރަށް ވަޑައިގެން އެ ރަށުގައި މިރޭ ބޭއްވި ޖަލްސާގައި ވާހަކަ ދައްކަވަމުން އިމްރާން ވިދާޅުވެފައިވަނީ, "ގަޔަށް ބޮލަށް އެރި ދުވަސްވަރު ހިނގައްޖެ." ކަމަށެވެ. އިމްރާންގެ ވާހަކަފުޅުގައި ފާހަގަ ކުރެއްވީ އިދިކޮޅު ޕީޕީއެމްގެ ވާހަކައެވެ. އިދިކޮޅުގެ ކެނޑިޑޭޓް ރައީސް ޔާމީން ޖަލުން މިނިވަން ކުރުމަށް ގޮވާލާ އެ ފަރާތްތަކުން ކޮންމެ ދުވަހަކު ދަނީ މުޒާހަރާ ކުރަމުންނެވެ.

އިމްރާންގެ ވާހަކަފުޅަށް ރައްދު ދެއްވަމުން ޝިޔާމް ކުރެއްވި ޓްވީޓެއްގައި ވިދާޅުވީ, އަދާަލަތު ޕާޓީގައި މިއަދު ހުކުރު ހަމަވާ ވަރަށް ވެސް މެންބަރުން ނެތް ކަމަށެވެ. އަދި ތޮށިގަނޑެއް ހިއްޕަވައިގެން އެހެން ޕާޓީތަކުގެ ވާހަކަ ނުދެއްކެވިއްޔާ މާ ރަނގަޅުވާނެ ކަމަށް ޝިޔާމް ވިދާޅުވިއެވެ.

ޝިޔާމް އިތުރަށް ވިދާޅުވީ, އިމްރާނަކީ ޓެރެރިޒަމްއަށް ހިތްވަރުދީ, އަދި ޓެރެރިޒަމްގެ އަމަލު ހިންގެވުމުގެ ތާރީޚް އޮތް ބޭފުޅެއް ކަމަށެވެ. އެހެންކަމުން ސިޔާސީ މަންފާައެއް ކޮންމެފަދަ ވާހަކައެއް ވެސް ދައްކަވާފާނެ ކަމަށާއި އެކަމާ ހައިރާންވެ ވަޑައިނުގަންވާ ކަމަށް ޝިޔާމް ވިދާޅުވިއެވެ.